"تعلن مصر للطيران عن وصول رحلتها رقم 777 القادمة من القاهرة"
يااااه، مش مصدقة إنى راكبة الطيارة ولوحدى ومسافرة كمان برة.. واللى مش مصدقاه أكتر إنى أخيراً قدرت أقنع ماما وبابا إني أسافر لحوبا لندن، دى ولا معجزة من المعجزات السبعة إنهم يوافقوا يسيبونى لوحدى.. كان نفسي من زمان أروحلها، نفسي أشوف البلد اللي بتحكي عنها دى وأشوف النظام وأعمل شوبينج بقى وأعيش.
مممم، بس يا ترى هحس باختلافات كتير ما بين مصر ولندن؟ أكيد طبعا، هى فيه بلد زى مصر!! ده إحنا محصلناش ولا هنحصل..
يا سلام أخيراً هخرج براحتى فى أى وقت.. وهشوف أماكن جديدة وهي أكيد هتظبطني ما إحنا زي بعض نحب الفسح والرغي.
إيه ده؟ وصلنا؟ يا دى الملل هبدأ تاني إجراءات المطار الرخمة والطابور الطويل والتفتيش.. وأحضر الفكة عشان البقشيش، لكن المرة دى بقى البقشيش بالاسترلينى..
هو فين الإتوبيس اللي هياخدني من الطيارة للمطار؟؟ شكله لسة ماجاش؟؟ إيه ده؟؟ هو أنا في المطار وللا بيتهيألي؟؟ إزاى ده؟؟ أكلم حوبا أسألها أحسن.
**********************************
"ياااااا سلام أخيرا جوجو وصلت لندن.. وحشتنى قوى البنت دى.. بقالى أكتر من سنة ماشفتهاش.. الله كلها دقايق وتبقى قدامى.. ونقعد بقى نرغى وننم زى زمان.. وحشتنى أيام وقعدات زمان.. واللى بسطنى أكتر إنها أول مرة تسافر برة ويوم ما تسافر تجيلى أنا.. إحساس جميل بجد.. ياللا يا جوجو والله مكتبولك تشوفى الدنيا على إيد حوبا.. يارب بس أقدر أبسطك وأعيشك يومين لا قبلهم ولا بعدهم"
" إيه ده؟ دى بترنلى على الفون أهو.. خيييير، ربنا يستر"
- جووووجو، حمدلله ع سلامتك.. ها إنتى فين دلوقتى؟
- حوبا، هو أنا بيتهيألي إنى نزلت من الطيارة على المطار علطول؟ وللا الأتوبيس أتأخر وللا إيه؟
- أتوبيس إيه!!! لأ، إنتى فى المطار دلوقتى.. مفيش أتوبيسات زى مصر.. من الطيارة للمطار عدل.. امشى بقى يللا لحد ما توصلى للكونتر
- يا سلااااام، إيه التكنولوجيا دي؟ هما عاملين جراج الطيارة جنب المطار على طول؟ طيب بقولك أمشى ازاى؟ ورا الناس يعنى وأريح دماغى وللا إيه!! علشان مش طالبة معاية أتوه وامشى ورا كلام الناس زى مطار مصر
- يا بنتى مش إنتى متعلمة برضه وللا عوامل التعرية غيرتك!! ما تقرى اليفط وتمشى ورا الأسهم.. وللا أقولك ريحى دماغك وامشى ورا الناس.. كلهم رايحين ع الكونتر محدش هيهرب من الباب الورانى
- خلاص يا حوبا أنا هقفل دلوقتى واضح إن الطريق طويل للكونتر..
******************
- "هى كل دة لسة بتيجي ؟؟ أما أكلمها أشوفها وصلت لحد فين".... ها، يا بنتى هو إنتى رجعتى مصر تانى وللا إيه؟
- لأ، لا تكلكى، تم بحمدالله وصلت للكونتر.. لقيت طابورين معرفتش الفرق فوقفت فى القصير اللى فيهم
- يا لهوووووى ع الجهل.. مش دة اللى على الشمال؟
- استنى كدة؟ آه ليه؟
- يا بنتى دة للى معاهم جنسية أوروبى بس.. وقصير علشان مش بيقفوا ع الكونتر.. مجرد الراجل بيشوف الباسبور مزيف وللا لأ ويتكلوا ع الله
- إحم، فعلا؟ وأنا اللى كنت فاكرة نفسى ناصحة علشان أنجز بسرعة
- طيب يا اختى روحى زى الشاطرة اوقفى مع عامة الشعب
- يوووووه، طيب.. بس هما ليه منظمين كدة؟ والناس ساكتة وكل واحد واخد دوره فى هدوء
- ده العادى يا جوجو يعنى.. فيه أوبشن كدة جديد إسمه النظام.. عدى عليكى قبل كدة؟
- أصل ف كونتر مطار القاهرة.. كان فيه خناقة هايلة.. الطابور كان طويل قوي وفجأة جه واحد مندوب شركة سياحة ومعاه فوج أجنبي ووقف فى الأول.. وطبعا إنتي عارفة عقدة الخواجة طنشونا كلنا علشان يخلصوا الأجانب الأول.. أمال إيه يعنى السياحة تتضرب وللا تتضرب!! وطظ ف المصريين اللى واقفين ف الطابور من بدرى.. بس فيه واحد بقى ماسكتش وراح مزعق وقال دول لو فى بلادهم ميقدروش يعملوا كدة.. احنا بس اللى بنعلمهم إن بلادنا مفيهاش نظام خالص
- ده العادى فى مصر.. بشوف المنظر ده كتير قوى وأنا مسافرة.. ما علينا، وصلتى لحد فين دلوقتى؟
- أهو وافقة منتظرة الفرج.. بس لفت نظرى حاجة عجبتنى
- خير، ارغى ارغى
- إيه يا حوبا الله؟؟ مش بسلى نفسى لحد ما أوصلك
- هااااااا
- إن فيه واحدة كدة واقفة مخصوص علشان لما تلاقى أم شايلة طفل بتطلعها فى أول الطابور.. لأ وإيه، ولا حد بيفتح بقه أو يعترض
- آه، أنا فعلا مرة كانت روشى على إيدى سخنة مولعة.. والموضوع ده بصراحة نفعنى جدا أنجزت الإجراءات بسرعة.. المهم دلوقتى هما هيسألوكى ع الكونتر كام سؤال كدة.. حاولى تفتكرى الكلمتين الإنجليزى اللى إتعملتيهم ف المدارس ماتهتهيش وتفضحينا
- عييييييييب عليكى، بس قوليلى هى كل شوية بتقول (next) مش ده برضه اسم محل؟
- عااااااااااااااا، لأ، لأ كدة أوفر.. مش عارفة دى معناها إيه؟ أمال هتقوليلها إيه لما تسألك شوية أسئلة
- طيب ياللا بقى باى.. دورى دورى
- ربنا يستر
*********************
- خلاص يا حوبا عديت
- شطورة، وعرفتى تتعاملى؟
- آه، سألونى أسئلة عادية كدة زى أنا جاية ليه وهعمل إيه وقاعدة قد إيه؟ بس ماجبتش سيرتك خالص.. لا تكونى مطلوبة ولا حاجة وتبوظى عليا الأجازة.. بس محترمين قوى بصراحة.. مبتسمين كدة على طول وهاديين ويدوكى فرصة تردى براحتك.. استمخيت منهم قوى.. يللا بقى أنا قربت أوصلك أهو..
*************************
- أحمدك يارب، عشت وشفتك قدام عينيا.. ماكانتش سفرية.. أمال هتعملي إيه بقية الأجازة؟
- حوبااااااااااااااااااااا، وحشتنيى.. إيه يا بنتى النظام ده كله اللى في حياتكم دة.. حاجة تخنق.. ده حتى الشيالين وبتوع الجمارك محترمين كدة تحسيهم ولاد ناس
- إشمعنى؟
- الأول لقيت واحد بشوش كدة سألنى تحبى أساعدك؟ طبعا وافقت مهو أكيد مستنى يقبض.. حطلى الشنط ع الترولى لحد ما وصلنى للجمارك.. كنت لسه بقى بفكر اديله كام وبحسبها بالمصرى هتبقى كتير وللا قليل فوجئت إنه مشى.. جريت وراه ولا بص لى.. افتكرته مش عاجبه البقشيش.. هو إنتوا هنا بتدوهم كام؟
- ههههه، جريتى وراه؟ ده إنتى زبونة والله.. هنا مش بيستنوا منك مقابل بيساعدوكى ويمشوا
- ياااااا راجل؟ مممم، دة واضح إنه هشوف إختلافات كتير قوى.. ده أنا هااااااعيش.. إلا بالنسبة للجمارك فضلت اتلكع كدة وأنا ماشية إن حد يوقفنى ولا الهوا.. وبعدين شكلى صعبت ع واحد منهم شاورلى علشان امشى ماوقفش الطريق
- ماهو يا بنتى مش بيوقفوا أى حد والسلام.. وبعدين عادة بتكون إنتى وحظك.. ولو فيه كلاب بقى بتسهل الموضوع أكتر.. لو الكلب ابن الكلب هوهو على حد يثبتوه وش ويوقف يتفتش.. المهم حمدلله ع سلامتك.. ياللا بينا
- ياللا... جايالك يا لندددددددن
رحاب المليحي
9 comments:
Sara Abdeen
ههههههههههههههههههههوصفتي الاحساس بالظبط بالرغم اني مسافرتش بس اكيد هحس بكده
افق لا متناهي من الغباء عااااااادي
مروة الزارع يالا يا حوبا مستنية الباقى
شوقتينى
سردك للاحداث جامد بجد
بس عارفة النظام للدرجة دى ممل اوى :D
هما بيطلعوا عينينا عقبال منسافر كدا
ربنا يستر مستنيه حبيبتى الجزء الثانى
Fatma ALzihery
جميل النظام احنا هنا بقى الناس الحلوين قطعو اللوح بتاعت الطلوع و النزول فى مترو الانفاق علشان نفضل ما عندناش اى نوع من انواع النظام بس تسلم ايدك يا حوبا
Mohamed Fattouh
بصي أنا هضحك شوية وهعيط شوية وأنتي بقي إفهمي
:DDDDDDDDDDDDDDDDDDDDDDDDDDDDDDDD
:'(((((((((((((((((((((((((((((((((((((((((((((((((((((((
Mohamed Shouman
Bamsa El 3ofy
ههههههههههههههههه..رحاااااااااب..هتطلعي بلاوي مصر كلها ف الحلقات دي..اذا كان ف المطار وكده..اومال لما تخرجي للشارع بقي
Basma Bahaa
el note gamila awe w shaklaha hateb2a selsela mshaweka;)))
Ganga Hoba
w8ing el part el tany gamel ya hoba
Rabab Basha
يا جماعه فيه حاجه انتوا
مش فاهمينها
لما شركات السياحه بيدخلوا بالوفود الاجنبيه ويعدوا بسرعه .. ديه مش بتكون كوسه ولا حاجه ؛ لأ طبعا احنا علشان عندنا حسن ضيافه بنخليهم يعدوا بدرى وقبلنا كمان
ههههههههههههه .. والله احنا شعب مفيش زيه اتنين
بس النوت حلوة اوى
Post a Comment