يوميات روشى وجومى... الحلقة الأخيرة

أنا نازلة يا جومى كمان شوية.. عايزة حاجة؟
- واء، إيه ده؟؟ على فين كده؟
- رايحة الحضانة وبعدين عندى تمرين سباحة
- واء، وهاتسبينى لوحدى؟؟ أنا زهقانة
- وأنا أعملك إيه يعنى!! قُعدى العبى أو اتفرجى على الكارتون
- واء، لأ زهقت من كل ده.. أنا عايزة اخرج معاكى باى
- أنا رايحة ألعب مع اصحابى فى الحضانة.. إنتى بقى هتعملى إيه!! وبعدين إنتى لسه صغيرة مش هيرضوا يدخلوكى معاية
- واء، كل يوم حضانة.. مش بتزهقى منها؟
- لأ طبعا، مش احسن من القعدة فى البيت!! وفى الحضانة بغنى والعب واتعلم كمان
- واء، كل ده بتعمليه؟ وأنا قاعدة فى البيت مش بعمل حاجة
- بُكرة إن شاء الله لما تكبرى هتروحى الحضانة.. ويكون عندك اصحاب كتير يحبوكى وتلعبى معاهم
- واء، وهانزل معاكى البسين؟
- ما إنتى بتنزلى معاية البسين وبابى معانا
- واء، ايوة، لكن مش بعرف اعوم
- يعنى أنا اللى بعرف.. ادينى بحاول اتعلم مع المُدرب.. علشان أنا بحب المية كتير
- واء، عاااااااااااا
- فى إيه تانى يا جومى؟
- واء، عندى واوا بتوجعنى
- واوا فين؟؟
- واء، من البامبرز.. إنتى إزاى كده مش بتلبسى زيي؟
- علشان أنا كبيرة وإنتى لسه صغيرة بتعملى على روحك
- واء، أنا مش بعمل على روحى يا روشى.. أنا بعمل فى البامبرز
- ده إنتى حتى بتنزلى البسين بالبامبرز.. ويتنفخ مية قد كدة.. إيه مش بيضايقك؟!
- واء، بيضيقنى طبعا وبحس إنى تقيلة أوى.. بس مش عارفة اعمل إيه؟!! هو إنتى قلعتيه إزاى؟
- فى يوم كده مامى رفضت تخلينى ألبسه.. وقالت لى إنى كبرت ولازم ادخل الحمام
- واء، إيه ده يا روشى وإنتى سمعتى الكلام كده على طول؟
- لأ طبعا، كنت فى الأول بعمل على روحى ومامى ماكنتش ملاحقة عليا هدوم.. واللى كان يغظها اكتر لما اكون لسه واخده دُش ونضيفة.. وأول ما تلبسنى اروح عاملاها على الهدوم
- واء، هاها، ما هى فعلا حاجة تغيظ.. وكنتى بتعملى إيه بليل وإنتى نايمة؟
- كانت مامى بتحُطلى مشمع تحت الملاية.. وكنت ساعات استناها لما تخرج من الأوضة وأشيل المشمع علشان ابل المرتبة.. وكانت بتيجى كل شوية تصحينى تدخلنى الحمام وأنا اعيط علشان بكون عايزة انام..
- واء، أنا ماشُفتش الحاجات دى يا روشى.. ده كان إمتى؟
- الكلام ده كان قبل ما إنتى تشرفى بشوية.. قالوا بقى إنى كبرت وبقى عندى سنتين ونص وكمان علشان يوفروا فى شرا البامبرز لما إنتى تيجى
- واء، مممم وكالعادة طبعا لما مامى تُحط حاجة فى دماغها.. اكيد علمتك فى الآخر إنك متعمليش على روحك؟!
- آه طبعا، ما إنتى عارفاها.. بس تعرفى كده احسن.. بدل التسلُخات والريحة الوحشة
- واء، وهى هتعمل كدة معاية إمتى؟؟ علشان كمان اعرف ألبس المايوه براحتى من غير ما يتنفخ مية
- اكيد لما تكملى سنتين وتعرفى تقوليلها إنك عايزة تُدخلى الحمام
- واء، هو إنتى ماخرجتيش ليه مش عندك حضانة؟
- آهههه ناستينى.. يا مامى، مامى، يلا بقى هنتأخر

تمت
رحاب المليحى