روشى والقطه بوسى

نياو نياو: صباح القشطه باللبن الحليب على عيون الجميل.. روشى (مُبتسمه): صباح الفُل يا قطتى يا جميله.. نياو نياو: يلا يا حبيبتى علشان نفطر.. روشى: لااااا.. هو كل يوم فطار فطار.. نفسى اصحى الصُبح على شيكولاته, بيبسى, لبان.. يا سلااااام نياو نياو (بعتاب): هو احنا كل يوم هنقول نفس الكلام.. نقول كمان: لازم تفطرى علشان الفطار مُفيد كتير للصغار وكمان الكُبار.. بيعطي الجسم طاقه لإستكمال باقى اليوم بنشاط.. * ذهبت روشى وقطتها بوسى المطبخ لتلقى تحية الصباح على أُمها وأبوها المُنتظرنها على مائدة الإفطار.. روشى: صباح الخير يا مامتى.. صباح الخير يا بابياه.. الأم: صباح الجمال يا حبيبتى.. نمتى كويس؟ روشى: ايوه يا ماما.. وصحيه مليانه بالنشاط والحيويه.. الأب: صباح النور يا روح بابا.. يا ترى إيه هى خطتك لقضاء يوم مُمتع ومُفيد؟ روشى (بعد تفكير): اعتقد يا بابا إنى هاخد بوسى وننزل نتمشى شويه.. الأم: قولى إنشاءالله يا حبيبتى.. روشى: صحيح يا ماما.. ليه الكلمه دى لازم ننهى بها كل كلامنا؟ يُجيب الأب: علشان لازم نقدم المشيئه يا حبيبتى.. مفيش حاجه هتحصل غير لما ربنا يشاء.. وهى لا تُستخدم فى كلامنا عن الماضى.. وإنما للحاضر والمستقبل فقط.. روشى: انا هخرج عشان ارجع قبل الليل إنشاءالله.. الأم: متتأخريش, لا تمشى فى ........ تُقاطعها روشى (بخفه): لا امشى فى اماكن خاليه من الناس, مكلمش حد معرفوش, معديش الشارع غير لما يكون خالى من السيارات......إلخ. عرفه يا مامتى الوصايا العشره اللى حضرتك عايزه تقوليها وحفظها.. الأب: طيب يا لمضه.. بس احنا دايماً بنكرر النصائح علشان متنسيش.. وتتصرفى صح.. روشى: طيب باى باى بئه.. عطلتونى.. عايزه الحق اليوم من أوله.. يلا يا بوسى.. نياو نياو: يلا يا روشى يا لمضه.. الأم (تبتسم) قائله: طيب يا حبيبتى.. خلى بالك من نفسك.. ومن بوسى.. * خرجت روشى مع بوسى إلى الشارع.. من أجل القليل من التنزه.. والكثير من الإستفاده.. ولم تنسى تنبيهات أُمها لها.. ولأنها تعلم إن أبويها واثقين فيها.. فتحرس دائما ألا تُضيع هذه الثقه.. روشى: تعالى يا قطتى نشترى شيكولاته ولبان ومصاصه.. تسلينا فى الطريق.. نياو نياو: اشترى حاجه واحده بس علشان توفرى فى مصروفك.. وكمان متنسيش إن كتر الحلويات بيسوس الأسنان.. روشى (متأففه): طيب نياو نياو (فى سرها): من الصعب إقناع الأطفال بسهوله.. وخصوصاً لما نمنعهم من اشياء يحبونها.. * واضطرت روشى أن تسمع كلام قطتها الوفيه.. لأنها تعلم إنها تخاف عليها مثل خوف أبويها تماماً.. ولكن بعد أن انتهيت روشى من أكل الشيكولاته.. القت الورقه على الأرض.. التقطتها بوسى بأسنانها وقالت لها فى عتاب.. نياو نياو: لأ روشى.. عيب ترمى الورقه على الأرض.. المُخلفات مكانها سلة المُهملات.. روشى: اشمعنا.. بُصى!! الشارع ملئ بالأوساخ.. وبصى لسلة المُهملات هتجديها نظيفه.. يمكن انظف من الشارع نفسه.. نياو نياو (ضاحكه): ها ها ها.. عندك حق والهى.. بس يا حبيبتى مش لازم نقلد الناس فى الحاجات الوحشه اللى بيعملوها.. مش علشان فى ناس سلوكها سئ.. يبقى لازم كُلنا نبقى مثلهم.. ونقول اشمعنا إحنا اللى هنكون أفضل.. لو كل واحد فكر زيك..يبقى محدش ابداً هيحسن من نفسه.. وقتها تبقى الحياه جحيم.. حاولى دايما إنك تبصى للناس اللى أفضل منك.. علشان تقلديهم وتكونى احسن منهم كمان.. * عندما قرروا عبور الشارع.. تذكرت روشى كلام أُمها عن حرصها عند العبور.. وأن تنتظر إلى أن يخلو الشارع من السيارات.. أو إلى أن تصبح الإشاره حمراء.. فأعتقدت إن المسأله سهلهً.. ولكــــــــن!!! روشى (مُندهشه): الشارع زحمه اوى.. ده لو انتظرنا الشارع يفضى يبقى هنخلل هنا.. (ثم نظرت إلى الإشاره).. هى الإشاره على طول لونها أصفر.. معنى كده إن حتى الإشاره مش مُفيده.. وطبعا يبقى السيارات عُمرها ما هتحترم الإشاره ولا فى سبب يجعلهم يقفوا.. نياو نياو ( مش عارفه تقول إيه): ممممم.. بصراحه الإشارات فى مصر مُعظمها مش شغال.. ولكــــن!! ممممم.. روشى: ها بئه.. هتقولى إيه المره دى يا بوسى.. هتنصحينى إزاى.. نياو نياو (بخبث فى سرها): مش هتعرفى تهزمينى يا قرده يا صُغننه.. فقالت لها: لما تجدى خطوره فى إنك تعبرى الشارع بمفردك.. ومعكى قطتك الجميله وهى طبعا بتخاف على نفسها.. يبقى دورى على شُرطى وتطلبى منه إنه يساعدك فى العبور.. فيمسك يدك.. ويحمل قطتك الصغيره ويعبر بكوا الشارع فى أمان.. ثم تشكريه على مساعدته.. * نظرت روشى إلى عقارب ساعتها حتى لا تتأخر على أُمها.. فوجدت إنه قد حان وقت الرجوع.. حتى لا يقلق عليها أحد.. روشى: انا جت.. نورت البيت.. ازيك يا ماما.. الأم: أزيك يا حبيبتى.. حمدلله على السلامه.. وحشتينى.. أحكيلى عن يومك النهارده.. بس قبل ما تحكى عايزه اقول لكِ على حاجه.. عند دخولك البيت.. لازم تسلمى على أهل البيت قائله: السلام عليكم ورحمة الله وبركاته.. روشى: دى طويله أوى يا ماما.. مالها هاى!! ماهى بتقضى الغرض برضه.. الأم: لأ يا روشى.. هاى دى كلمه أخدنها من الأجانب.. ولكن السلام المُتعارف عليه بين المُسلمين هو السلام عليكم.. وعندما تقوليه عند دخولك أى مكان ينشر فيه السلام.. وتُسلم عليكى الملائكه.. وايضا يطرد الشياطين من المكان.. شُفتى بئه أد إيه السلام مُهم.. مش مُجرد كلمه تُقال.. احكيلى!! يومك كان مُمتع ومُفيد؟؟ اجابت روشى (وهى تنظر لقطتها فى حُب): ايوه يا ماما.. كان يوم جميل.. وبوسى علمتنى حاجات كتير.. يمكن تكون اشياء صغيره ولكن قيمتها كبيره.. * ابتسمت بوسى إبتسامة فخر وإعتزاز.. وقالت فى سرها: انا فى خدمتك دائما يا صغيرتى.. * وبعد العشاء ذهبت روشى ومعها بوسى للنوم بعد يومهم الطويل.. يحلمون بيوم مُشرق جديد ملئ بالإمتاع والإفاده.. رحاب المليحــــــى