عقاب ربنا

بنوتة رقيقة ف حالها مستسلمة للى ربنا يكتبهولها.. كانت زى اى بنت بتحلم بالجواز عن حب.. ولكن دايما مش كل اللى بنتمناه بنلاقيه

اتقدم لها عريس من وجهة نظر اهلها انه لُقطة وجاهز.. وعشان هى بنتهم الوحيدة كانوا شايفين انها مش هتلاقى احسن من كدة.. وتبقى تحبه بعد الجواز بقى براحتها

وعشان هى دايما بتيجى ع نفسها.. وفقت ع مضض واتجوزته.. ماكنتش طايقاه.. بالمعنى الحرفى للكلمة..  وشاء ربنا انها تخلف منه بنتين.. 

واكتفيت بيهم وعاشت عشانهم.. وكل ما كانت تفكر ف الطلاق تخاف ع مصير بناتها ف تتراجع

لكن جوزها ماكنش مُكتفى بالبنتين كان نفسه ف الولد.. وفضل وراها ف ضغوط مستمرة عشان تجيب له الولد.. 

لحد ما حملت تانى فعلا.. بس وقتها كانت كارهه نفسها وكارهه اللى ف بطنها وكان هاين عليها تنزله بأى طريقة

انعزلت عن الناس، وبقيت تقضى وقتها ما بين الاكتئاب والبكاء ع حظها السىء اللى ماكنتش يوم تحلم بيه.. 

لما وصلت الشهر الخامس ف حملها.. بدأت ترضى بالأمر الواقع وتحب طفلها اللى لسه ماشفتوش.. 

خصوصا انها كانت كل ما تعيط تحس بيه بيضرب برجليه ف بطنها.. ف حبيته وحسيت انه هو الوحيد اللى حاسس بيها وانه كدة بيطبطب عليها

بس برضه فضلت ف انعزلها وحزنها.. لحد ما ف يوم مامتها كانت بتزورها وحسيت بتعب بنتها النفسى ف قررت تبات جانبها ف سريرها

وف نص الليل.. صحيت الأم ع تخبيط بنتها ع السرير.. فوجئت ببنتها الوحيدة عندها تشنجات وعينيها رايحة وعاملة تنزل رغاوى ودم من بوقها.. أمها صوتت وجريوا بيها ع المستشفى..

مفيش ولا مستشفى كانت راضية تقبلها.. لحد ما ف الاخر مستشفى قبلتها.. وفضلت ف العناية المركزة يومين..

 وكان جوزها قلقان عليها جدا لإنهم كانوا متوقعين وفاتها بعد الحالة اللى وصلت لها

وفضلت اليومين ف غيبوبة.. ف الدكتور  قرر انها لازم تولد ف شهرها السابع.. لإنه طول ما هو ف بطنها هتفضل ف غيبوبة.. 

وفعلا ولدوها.. وكان ولد، وقعد ف الحضانة خمس ايام ومات

فاقت هى بعدها وماكنتش عارفة هى فين ولا فات وقت قد ايه ولا ايه اللى حصل.. ولما بلغوها بخبر وفاة ابنها اللى حتى مالحقتش تشوفه وتودعه قبل ما يمشى

دخلت ف دور اكتئاب وعزلة عن الناس من تانى.. حاسة احساس فظيع ان هى السبب ف موته.. عشان ماكنتش عايزاه من الاول.. 

وانها لما قررت تقبل الوضع وبدأت تحبه وتحب احساسه بيها وهو ف بطنها، ربنا قرر يعلمها درس عمرها ما هتنساه ف حياتها

وبعد ما جوزها اطمن انها حالتها الصحية استقرت رجع من تانى يزن عايز الولد

رحاب المليحي

مامتى مريتى

مهما تعلم ف الصغير..

فهو ف الاخر هيقلدك ف كل حاجة بتعملها

عشان انت قدوته

 

-         يا بنتى بطلى تفتحى بقك وانتى بتاكلى

-         ما انتى بتعملى كدة يا مامى؟

-         انا؟ امتى ده؟

-         امبارح

-         كان الاكل سخن ف كنت بنفخ فيه وهو ف بُقى

*****

-         انتى مش هتبطلى ترمى هدومك ع السرير؟

-         يا مامى ما انتى عملتى كدة؟

-         انا ؟ امتى ده؟

-         الاسبوع اللى فات

-         كنت عايزة الحق اتفرج البرنامج  اللى بحبه

   ****

-         انتى يا بنت، مية مرة اقول لك ماتكليش بإيدك الشمال

-         هو مش انتى عملتى كدة يا ماما؟

-         امتى ده يا ناصحة؟

-         من يومين

-         اه، بس كانت ايدى اليمين متعورة

****

-         وطى التلفزيون يا بنتى شوية

-         ما انتى بتعليه كمان

-         انا؟ امتى ده ؟

-         الويك اند اللى فات

-         كان فيه أغنية عجبانى

-         وبعدين بطلى كل حاجة تقولي لى ما انتى بتعملى كدة

-         ما انتى بتعملى كدة يا مامى

-         بنت؟

-         مهو انا بقلدك ف اللى بتعمليه يا مامى.. مش انتى مريتى!!

رحاب المليحي

مصلحتى فوق كل اعتبار

أنا هحكى حكاية أختى واللى اتعلمت منها دروس كتير

ابن خالى عايش ف استراليا جاب لأختى عريس مصرى عايش برضه ف استراليا.. 

من ناحيه العريس عايز عروسة ع حسها ياخد الاقامة.. ومن ناحيه تانية اختى عايزة تهج من مصر وتسافر وتتفسح.. فـــ حصل قبول بدون أدنى تفكير من الطرفين، من قبل حتى ما يتقابلوا

ونزل العريس مصر أسبوعين حصلت الخطوبة وسافر تانى.. وتالت اسبوع بعد سفره عمل توكيل لأخوه عشان كتب الكتاب 

وبعد كتب الكتاب فضلت اختى كل ما تروح السفارة ورقها يترفض.. فضل الحال ع كدة سنة.. لحد ما اهلى طلبوا من العريس انه ينزل يكمل الجوازه بقى ف مصر ويعملوا الفرح عشان مش هينفع يستنوا اكتر من كدة

العريس فلاح من رشيد ومن عادتهم وتقاليدهم ان الفرح يتعمل ف بلدهم.. ده غير ان العروسة لازم تعيش مع حماتها ف رشيد.. يعنى الشقة كمان تكون هناك

اهلى طبعا رفضوا مبدئيا ان الفرح يتعمل ف البلد.. ف العريس قالهم لو الفرح ماتمش هناك امى ممكن تموت فيها.. اهلى صمموا ع رأيهم والعريس ف الاول ركب دماغه وقال وانا كمان مش نازل مصر

راحت أختى طالبه منه الطلاق.. بس هو عشان كان بدأ يحبها ف وقف قدام أمه وجاب لأختى شقة ف القاهرة.. 

وبالنسبة للفرح مسك العصاية من النص وقال خليه ف اسكندرية، لا منه ف القاهرة ولا منه ف البلد

لكن لما نزل مصر رجع  ف كلامه.. وقال أنه مايقدرش يخالف كلام أمه ولا يغضبها وان الفرح هيتعمل ف البلد.. 

ولما بابا لاقاه مش راجل ومالوش أمان ومش قد كلمته.. فـــ صمم انه يخليه يكتب شقة القاهرة بأسم أختى.. وعمل كدة فعلا وكتب الشقة بأسمها من ورا والدته

بس أمه أصرت انه يفرش شقة ف البلد.. فأهلى قالوا مفيش مشكلة طالما ضمن لها شقة ف القاهرة يفرشوا عادى شقة ف البلد

اهل العريس أخدوا منه 150 الف جنية ع انهم هيفرشوا شقة البلد.. لكن ضحكوا عليه ووضبوا شقة أمه بالفلوس وبيضوا العمارة كمان.. وجابوا حاجات رخيصة ومقرفة جدا لشقة أختى.. واهلى انا اللى اضطروا يوضب لهم الشقة

وبرغم كدة قولنا مش مشكلة ونمشى الموضوع ونعمل الفرح

بعد ما سافرت شهر العسل.. قعد الشهر مقربلهاش خالص.. وكل اللى نازل عليه يبهدلها ويشتمها.. بعدها اكتشفنا ان مامته عمله لأختى (سحر) عشان تخليه مايقربلهاش

لما رجعوا بعد الشهر اللى ماكنش عسل بالمرة.. قال انه معهوش فلوس يأجر شقة ف القاهرة لان اللى كان جايبها لاختى ف القاهرة ماتفرشتش.. ف لازم يروحوا يعيشوا ف شقة البلد.. أختى رفضت وطلبت الطلاق

بعدها فكينا السحر وجم قعدوا ف القاهرة..

 وأختى بعدها بقيت حامل.. 

بس عشان أختى كانت دايما بتحب تكون هى المُسيطرة وتهزقه وتشتمه قدامنا.. هو ف الاول كان كويس جدا معها بس من معاملتها السيئة معاه بدأ يرد الشتيمة بالشتيمة.. وبدأ حبها ف قلبه يقل.. حتى ماكنش مهتم خالص بكونها حامل ف أول طفل وكان سايبها وقاعد عند مامته ف البلد

والحمل كان هيسقط كذا مرة.. 

ومامته كل شوية تكلم أختى تقولها انتى لازم تجيبى ولد وكلام الفلاحين ده.. وف الاخر جابت بنت

المهم، بعدها هو رجع استراليا وهى فضلت ف مصر وبقى يشوف بنته بس ع النت.. لكن علاقتهم مابقيتش كويسة.. 

وتقريبا وصلوا لمرحلة انهم بيكرهوا بعض وعايزين يطلقوا.. وهو دلوقتى شرطه عشان يطلقها، أختى تتنزله عن الشقة وهو هيتنزلها عن البنت

ده بقى خلانى اخاف جدا من جواز الصالونات عشان مش عايزة اكون صورة مكررة لأختى

بس هقول ايه ربنا يهدلهم الحال

رحاب المليحي