انا قروية من الشرقية.. ليا أخ كان
بيشتغل ف الاردن..
فوجئت بيه بعد ما خلصت ثانوية عامة.. جايب لى عريس من بلدنا بس
مهاجر الاردن من 6 سنين وبيشتغل نجار..
اخويا كان بيُشكر فيه قوى.. وعمال يقنعنى
بيه انه كسيب وبئاله 6سنين ف الاردن وغنى.. وانه اينعم مش مُتعلم لكن يكفى انه
بيعرف يقرا ويكتب.. والاهم انه غنى وهيعيشنى عيشة هنية
حاولت ارفض فكرة انى اتجوز واحد
لا اعرفه ولا يعرفنى ولا حتى شوفته قبل كدة وكمان مش مُتعلم..
وانى لسه صغيرة عندى
17 سنة بس.. لكن زادت ضغوط اهلى عليا بإقناعى ان الراجل ميعبوش غير جيبه
ف الاخر اضطريت اوافق ع مضض..
العريس كمان مانزلش يتجوزنى بعت توكيل لأبوه..
وسافرت له الاردن ع وعد منه لأهلى
انه يعمل لى فرح يليق بيا ف الاردن وكمان يبنى لى بيت هناك
أول ما وصلت ماتمتش الدخلة لإنى
كنت ف انتظار الفرح اللى وعد بيه..
قعد يزن هو واخوه ومراة اخوه عليا انا واخويا
ان الفرح مُكلف وانه مالوش لازمة وان احنا مش ف بلادنا عشان نتفشخر ونعمل فرح
حسيته شخصية مهزوزة وضعيف قدام
اخوه المُسيطر عليه.. وعشان يوصل لحل وسط راح حجز ف فندق تعبان قوى..
بعدها راح يعمل الدولاب اللى كان
ناقص ف اوضة النوم.. ف كان بيعمله بنفسه بما انه نجار.. قام المُنشار قاطع صوابعه (السبابة
والوسطى).. وطبعا كان لازم وقتها اتنازل عن الفرح لإنه قعد وقتها ف المستشفى
فى اقل من 3 شهور بانت حقيقته انه
مفلس ومفيهوش ريحة النخوة ولا الرجولة.. وماكنش معاه حتى تمن ايجار البيت
اخوه نصحه انه يشتغل بواب.. عشان يعيش ف البيت ببلاش..
وللاسف هو وافق.. ومش بس كدة، لا ده كمان شغلنى ف البيوت
امسح واكنس.. ووقت مايكنش موجود اشتغل انا مكانه بوابه
كل ده واهلى ميعرفوش حاجة ..
واساسا بعد ما وصلت الاردن بفترة قليلة مراة اخويا ماكنتش طايقة تكمل ف الاردن ف
رجعت مصر وبعدها رجع اخويا ع طول
ولانى كنت مرعوبة من فكرة انى
اكون مُطلقة تنازلت واستحملت كل البهدلة والاهانة اللى كنت شايفها معاه..
وهو من وجهة نظره كان شايف ان الشغل مش عيب وان
شغلانة الخدامة أو البوابة دى اكتر شغلانة تجيب فلوس
اخوه كان بياخده يشغله عند ناس ف
الموبيليا.. وبعدين ياخد تعبه ويقوله انت مش محتاج الفلوس وانا اللى جايب لك الشغل
يبقى ده حقى انا
عشت معاه 4 سنين ف مهانة وذل
وكسرة نفس.. وربنا ما أردش انى اخلف منه..ف كان اخوه دايما يبهدلنى ويعيرنى بعدم
الخلفة وكمان يقول عليا انى مغرورة وبخرب حياتهم
ده كله عشان انا كنت بحب البس
مودرن وهما عايزنى البس جلابية وادعى الفقر عشان استعطف الناس تدينى فلوس
خلال فترة جوازى بيه نزلت مرتين
مصر..
اهلى كانوا حاسين ان فيا حاجة وانا ماكنتش برضى اقولهم عشان رافضة انى اخد
لقب مُطلقة..
امى
تقولى : القعدة
في الخزانة ولا الجوازة الندامة.. انا قلبي كان حاسس.. ياما اتفزعت بالليل.. وياما
قلبي اتخطف.. واقول يا لهوي يا بنتى.. يا ترى فيكي ايه.. وانا ايه اللي كان هبلني
وخلاني اجوزها الجوازه دي؟!
وبابا يقولي: انا حاسس اني
جنيت عليكي.. انتي متأكده انك مرتاحه؟ اقوله اه
تانى زيارة ليا لمصر كنت نازلة وناوية ع طلاق..
لكن هو جه ورايا واهلى صالحونا ع بعض.. لكن قبل ما ارجع معاه شرطت عليه انى مش
هشتغل ف بيوت تانى.. عشان نفسيتى تعبت وانى هساعده عشان نحوش ونشترى شقة وهو وافق
ع شروطى
بعد ما رجعنا الاردن ف يوم
بهزار بقوله: فلانة بتقولى انها مسافرة اجازة وانى امسك مكانها ف شغلانة البوابة
لحد ما ترجع
لاقيته وشه قلب وقالى: دي
بنت تيييت ولازم تقطعي عيشها وتمسكي مكانها
انا اتخضيت فعلا ماكنتش
مصدقه انه خلف وعده تانى معاية
قلت له: انت بتتكلم جد؟
قالى: ايوة الست هى اللى
بتجيب الفلوس دلوقتى مش الراجل
الأسوأ من كل ده ان كتير من
المصريات ف الاردن ماشيين غلط.. ف كان بيتبص لى نفس البصة
ولما كنت اتخانق معاهم يتعصبوا
ويقولولى: يا زبالين يا خدامين يا ولاد الكلب يا مصاروه
فضلت 7 شهور ضاغطة ع اعصابى
وخلاص بفكر جديا ف الطلاق.. وف يوم روحت مع واحدة زميلتى عند راجل كبير كانت هى
شغالة عنده.. وسمع حكايتى وتعاطف معاية قوى وحبنى.. كان برضه خارج من قصة فاشلة..
وكان اكبر منى ب 24 سنة
ولما قررت انزل مصر عشان اطلب
الطلاق.. وقف جانبى وساعدنى.. وبعد ما نزلت مصر كان عايز يتقدم لى بس كان منتظر ان
موضوعى ينتهى الاول
ولما جوزى سمع بالموضوع
ده.. اشترط انه عشان يطلقنى عايزنى ادفع له 50 الف جنية.. وفضلت بينا محاكم ف
الاردن..
واتفاوضت معاه وصلتهم ل5000 دولار، وزوجى الحالى دفعهم والتانى طلقنى
وبعدها بفترة اتجوزت من
جوزى الحالى اللى يكبرنى ب24 سنة.. وخلفت منه ولد وبنت وعايشة معاه بقالى 13 سنة..
وسعيدة ف حياتى جدا جدا..
وبحمد ربنا انه عوضنى خير براجل فعلا بيحترمنى وبيحبنى..
الحمدلله
رحاب المليحي
