حكاية ولا ف الحواديت

أنا حكايتى غريبة قوى حتى ليا أنا شخصيا

أنا شاب متجوز وعندى أطفال.. بدأت حكايتى على الفيس بوك..

 كان ليا شلة بقابلهم على أرض الواقع.. وكنا بنقعد نهزر على الفيس..

 وفى مرة واحدة معرفهاش لاقيتها بعتالى اضافة.. ولما لاقيتها كومون فريند ما بينى وبين شلتى قبلت الاضافة

وبقيت اتكلم معها ع الفيس عادى جدا زيها زى بقية الشلة اصحابنا.. وقابلتها وسطهم برضه.. وكنت احيانا بوصلها لحد اقرب مكان لبيتها أو لموصلة هتاخدها.. وده برضه كان العادى لما بيكون معانا بنات 

العلاقة بينا قعدت فترة طويلة صداقة بس.. لكن انا كنت حاسس ان الموضوع بالنسبة لها اكتر من كدة.. بس ماكنتش بقولها حاجة.. 

لحد ما هى بدأت تلمح وصارحتنى انها بتحبنى.. كنت متردد اقولها انى متجوز برغم انها بالنسبة لى ماكنتش اكتر من صديقة..

ولما سألتها ايه اللى خلاها تحبنى.. قالت لى ان جدعتنى  وحنيتى يخلوا اى واحدة تتعلق بيا وان من جوايا حد جميل

كنت كل ما اقرر انى هواجها واقولها انى متجوز كنت ارجع بعدها ف قرارى خوفا انى اكسر قلبها..

 بس بقيت حاسس انها لود على اعصابى.. خصوصا انها كانت احيانا بتتصل بيا بليل.. ومارضاش ارد عشان مراتى ماتحسش بحاجة.

 لحد ما فى يوم اخدت القرار وطلبت منها اننا نتقابل لوحدينا.. وفعلا قابلتها وقلت لها انى منفعهاش عشان انا متجوز.. 

هى ماكنتش مستوعبة الكلام واتصدمت.. حاولت اقنعها ان علاقتنا دى ماينفعش تستمر ولازم ننهيها.. لكن هى رفضت بشدة..

 وهددتنى انها هتقول لأصحابنا كلام كتير ماحصلش.. زى اننا كنا مرتبطين عشان كدة كنت مخبى عليها انى متجوز.. وانى طلبت منها نروح شقة وهى اللى رفضت.. وكمان هتوصل لمراتى وتقولها نفس الكلام

مافرقش معاية كلامها وقلت لها اللى عندك اعمليه انا مابتتهددش.. ولا هاخسر بيتى واسرتى عشانك

وفعلا بدأت تنتقم وراحت حكيت لأصحابنا كلام ماحصلش.. وجم هما يعاتبونى.. 

وبرغم ان هى كانت صعبانة عليا بس ماكنتش طايق افعالها.. وكان نفسى انهى الموضوع بأى شكل.. 

انا فعلا ماكنتش عارف ايه سبب تعلقها الكبير بيا ده.. خصوصا انها بنت آيه ف الجمال ومتعلمة وأى واحد يتمناها

بعدها قلت اتكلم معاها تانى وافهمها الوضع ، يمكن تحل عن نافوخى.. فوجئت بيها بتقولى يإما اكون معاك يإما هنفذ تهديدى واديك شفت البداية.. 

ولما لاقيت نفسها ممكن تخسرنى عرضت عليا نفسها ف الحرام.. رفضت بشدة، ف قالت لى انا راضية اكون معاك جنب مراتك بس ماتسبنيش

بقيت حاسس انى مُطارد ومش عارف اتصرف معاها ازاى.. عملت لها بلوك ع الفيس وبطلت انزل اقابل اصحابى علشان هى كانت عارفة ممكن تلاقينى فين

لحد ما لاقيت واحدة صاحبتها جاية تصارحنى بسر كانت هى مخبياه عنى.. انها عندها ورم خبيث ف المخ ونسبة شفاها ضعيفة

الموضوع ده زلزلى دماغى وخلانى اتراجع عن اى حاجة كنت بفكر اعملها.. ورجعت كلمتها وصارحتها انى عرفت.. 

قالت لى انها ماكنتش عايزة تقولى خوفا من انى اسيبها.. شجعتها وقلت لها انها هتعيش وماتخفش 

بس لاقيتها بتقولى انا عايزة اموت نفسى قبل ما المرض يموتنى.. وكمان عشان انا مش ف قلبك وانت متعرفش يعنى ايه حب

قلت لها لو معرفش يعنى ايه حب ماكنتش ابقى متمسك ببيتى ومراتى 

بقيت بكلمها بس ع فترات متباعدة.. وكان بقالى شهر ونص معرفش عنها حاجة.. فجأة لاقيتها قدامى ف الشارع صدفة

صدفة ماكنتش اكتر من دقيقتين،

 اول ما شافتنى قالت لى: انت بتبعد عنى بس عشان ربنا عايزنى اكون معاك خلانى اقابلك صدفة

حسيت انى نفسى احضنها.. كانت صعبانة عليا قوى.. كنت حاسس انها مش هتكمل

بعدها بخمس ايام بالظبط جالى خبر وفاتها.. 

ماكنتش عارف انا صاحى ولا نايم؟ 

دى حقيقة ولا كابوس؟

 كنت حاسس انى عايز اموت نفسى.. 

حاسس ان فيه حاجة ربطانى بيها، هى ايه؟ مش عارف، لكن مش حب

اصحابها قالولى انها انتحرت بسببي وكمان عشان نسبة شفاها ضعيفة.. 

وكل شلتنا اللى كانت كومون ما بينى وما بينها قطعوا معاية بعد وفاتها

انا فعلا تايه ومش عارف انا كنت صح ولا غلط؟ 

كنت قاسى معها ؟

 ولا كان لازم اعمل اللى كنت بعمله عشان تبعد عن طريقى وتشوف حالها؟

بس ف كل الاحوال ربنا يرحمها ويغفر لها يارب   

رحاب المليحي             

حوار مع نفسى

(حوار بينى وبين نفسى ف المراية)

أنا: ايه يا واد الحلاوة دى كلها؟

نفسى: حلاوة ايه يا عم انت؟ ده انت كرش وطلع لى بنى ادم

أنا: كرش؟ هو فيه أحلى من الكرش وهو طالع نازل يتنطط قدامك كدة وانت ماشى

نفسى: ده انت بقيت عامل زى الكورة، شوية وهتتدحرج

أنا: بقولك ايه، أنا كدة حلو وعاجبنى.. اسكت انت بس

نفسى: طب ايه رأيك تعمل رجيم وتخس؟

أنا: ههههههههه رجيم؟ بقالى سنين بسمعك بتقول كدة

نفسي: لأ المرة دى أنا نويت، هخس واروح الجيم كمان

أنا: جيم؟ الكلمة دى أخدتها زمان.. مش ده برضه المكان اللى بيلعبوا فيه رياضة؟

نفسى: اتريق براحتك، بكرة أخس وتشوف هبقى عامل ازاى

أنا: تخس ايه بس، هو فيه أحلى من فرخة محمرة مع مكرونة بالباشميل، بعدها تحلى بأيس كريم بالمكسرات وتحبس بقى بحاجة ساقعة صاروخ

نفسي: انسى الكلام ده، أنا خلاص هبدأ من بكرة 

·         تانى يوم

أنا: ايييه ده؟ ده انت شكلك تعبان خالص، هو أنا مش قلت لك فكك من الجيم ده، شفت ازاى عينيك حمرا وبتنهج ورجليك مش شايلاك

نفسى: هى دايما البداية كدة صعبة.. لكن مفيش حاجة مستحيلة.. أنا هكمل وهنجح

·         بعد مرور أول اسبوع

أنا: هههههه ولا أكنك طلعان عينيك ف الجيم، ولا شايف أى حاجة خست

نفسي: مهو لو الموضوع سهل كدة ماكنش حد غلب.. لسه المشوار طويل

أنا: مش ناوى ترجع ف كلامك؟ ماوحشكش المحمر والمشمر؟

نفسى: ياما كلت منه، مش هيحصل حاجة لما احرم نفسى منه شوية عشان قدامى هدف، وهوصل له بقوة ارادتى

·         بعدها (نفسى) قررت ما تبصش ف المراية عشان (أنا) ماتحبطهاش وبعد مرور 15 اسبوع

أنا: ايه ده؟ مين ده؟ ايه الحلاوة دى يا واد؟

نفسى: مش قلت لك البداية دايما صعبة، لكن النتيجة مضمونة

أنا: أنا ماكنتش مصدق انك هتستمر، مهو كل مرة بتزهق ومش بتكمل

نفسى: لكن المرة دى كانت قوة ارادتى قوية، عشان ببساطة شكلى كان بقى وحش وهدومى مابقيتش بتدخل فيا.. بص دلوقتى بقيت عامل ازاى.. انا حقيقى فخور بنفسى

أنا: فعلا، ليك حق تفخر، هو انت نزلت كام كيلو؟

نفسى: 15 ك 

أنا: كم؟ هو أنا كنت تخين قوى كدة؟ عملتها ازاى دى؟

نفسى: يوميا بروح الجيم اجرى ساعة، باكل حاجات خفيفة ع مدار اليوم، ووجبة الغداء باكل اللى موجود لكن بكميات قليلة حتى لو هقوم جعان، وبليل باكل فاكهة

أنا: مممم مهى سهلة اهه

نفسى: لأ مش سهلة طبعا، انت بيتهد حيلك ف الجيم، ده غير انك بتيجى ع بليل وبتكون جعان وعمال تلف حولين نفسك زى النحلة.. وف الاخر قوة ارادتك تشتغل ف تاخد جزرة او تفاحة، وتوهم نفسك انك كدة تمام شبعت

أنا: طب خلاص كدة بقى وصلت لهدفك، مش كدة؟

نفسى: لأ طبعا انا لسه فاضل لى 5ك كمان.. عايز لما اوزن نفسى الاقينى ع الميزان بقيت رقمين بس مش تلاتة

أنا: تفتكر هتقدر؟

نفسى: هتحبطنى تاااانى؟ ده حلم حلمته طول حياتى وماكنتش متخيل ان هيجي اليوم واحققه، بس الحمدلله طول ما قدامك هدف وعندك قوة ارادة بتحقق المستحيل حتى لو العالم كله وقف ضدك

أنا: بص يا نفسى انت علمتنى درس عمرى، إن مفيش حاجة اسمها مستحيل.. المهم فى أى حلم إنى أبدأ فيه الخطوة الأولى.. وحتى لو ف النص طريق ضعفت، أقوم اقف وأكرر المحاولة.. المهم ماتستسلمش.. 

وحتى لو ماكملتش تحقيق الحلم لأخره.. بس المهم أنى بدأت ويكفينى شرف المحاولة.. عشان مايجيش يوم أبص ورايا واقول يارتنى كنت بدأت

اشوفك يا نفسى ف حلم جديد

 فكرة وسيناريو: مصطفى عبداللا

تعديل واخراج: رحاب المليحي

روشى والبريمدز

-         مامى احنا الترم ده هنتكلم فى المدرسة عن (الإيجيبشن)

-         مممممم من 3 ابتدائى وف لندن؟ طب والله كويس

-         (التيتشر) كلمتنا عن (البيرميدز) وعشان انا بس (الإيجيبشن) ف الفصل.. الميس قالت لى انى أساعدها ف الكلام عن (الإيجيبشن)

-         طيب يا روشى لما الميس تقولكوا على حاجة تعالى قوليلى وأنا أفهمهالك

-         بس أحنا يا مامى معندناش (بيريمدز) ف مصر؟

-         والله العظيم؟ لأ، كدة أنا ضمنت انك هتفسحى الميس بتاعتك.. وتبقى ونعمة المُساعدة ليها الحقيقة يا حبيبتى

-         وفيه بقى يا مامى كلب ف (البيرميدز) عامل كدة اهو

-         كلللللللب؟؟!!! ابو الهول بقى كلب؟ وده بيكون بره الاهرامات مش جوه

-         لأ يا مامى كلب وكان جوه

-         نو يا روشى اسمه (سفينكس) أو أبو الهول وبيكون بره

-         (ال) ابو الهول ده بقى يا مامى ......

-         من غير ال.. ابو ع طول

-         والميس كمان قالت لنا ان  ف الاهرامات (موميز) معمولين (رابينج).. 

وعندنا هوم وورك اننا نعمل (بريتدنيج) لأى (مومي) ونشيل منه بقى حاجات ونعمله (رابينج)

-         لا والله؟ وانا اجيب لك منين جثة نشيل منه الحاجات؟ ممكن بقى نغُز أبوكى ونشيل منه قلبه وكرشه ونلفوا بمناديل.. مهو لازم نضحى بأى حد ف سبيل هوم ورك حضرتك

-         وكمان الميس قالت لنا ان (الإيجيبشن) بياكلوا سمك وبيض وعيش و....

-         انتى ليه محسيسانى انهم جايين من كوكب تانى يا بنتى؟ بياكلوا كل حاجة

-         احنا ف المدرسة عملنا عيش ايجيبشن

-         بمساميره؟!

-         هه؟

-         لا، ولا حاجة يا روشى كملى

-         والميس عملت لنا (برتندينج) ان فيه ولد (ايجبشن) كان عايش ف مصر ومامته معهاش فلوس (بوور)،

 ف هى قالت له يبيع عيش ويجيب لها فلوس بس هو معرفش ازاى يعمل العيش.. ف جالنا لندن وبقى معانا ف الفصل عشان نعلموا ازاى يعمل العيش (الإيجيبشن)

-         لا ونبى؟ ونعمة التخيلات، بقى هو فقير وجه لندن؟!

-         انا عايزة اروح (البريمدز) يا مامى لما ننزل مصر

-         اتفرجى ع صوره ع (جوجل) مؤقتا لحد ما اوديكي ان شاء الله

رحاب المليحي