** يُحكى أن فى بعض البيوت اللى هى طبعا مش بيوتنا.. فيه بعض الأمهات اللى هما طبعا مش أمهاتنا.. بيعملوا شوية فصول بايخههههه فى عرسان وعرايس بناتهم وولادهم.. يجعل كلامنا خفيف عليهم:
- ماما، فى واحد معايا فى الشغل عايز يقابلك
- خير، إشمعنى؟
- عريس يا ماما أكيد
- عريس؟؟ وده عرفك منين؟ شكله إيه؟ مرتبه كام؟ عنده شقة وللا لأ؟ اتكلمى ساكتة ليه ؟؟
- هو حضرتك مديانى فرصة، قلت لك معايا فى الشغل.. كل اللى أعرفه عنه إن سُمعته كويسة فى الشركة.. لكن أى تفاصيل تانية تعرفيها بقى منه
- يعنى عايزة تقنعينى إنكم ماتكلمتوش فى أى تفاصيل؟!!
- لأ، كل الحكاية إنه قال لى إنه معجب بيا وإنه عايز ييجى يزورنا
- ممممم، ولو افترضنا إنى صدقتك.. افرضى ماكانش مستعد ماديا للجواز.. هاتوافقى عليه برضه لمجرد إن سمعته كويسه!!!
- ماما هو إنتى ليه بتسبقى الأحداث؟! ما تقابليه الأول وقرريه ووقعيه فى الكلام بقى بمعرفتك
- لما نشوف، ما جاب الغراب لأُمه
**********************************************
- هو ده بقى عريس الغفلة اللى انتى عايزة تتجوزيه؟؟ ليه إن شاء الله هو إنتى بايرة وللا بايرة وللا تكونى بايرة!!!
- مالك بس يا حبيبتى، إيه بس اللى مش عاجبك فيه؟
- إيه اللى مش عاجبنى!! قولى إيه اللى عاجبك إنتى فيه؟؟
- إبن حلال، وإبن ناس، يعنى ده على قد معرفتى البسيطة بيه
- وهى دى أسباب قوية تنجح الجوازة من وجهة نظرك؟؟ صحيح ما إنتى لسه عيلة مش فاهمة حاجة
- قوليلى إنتى يا ماما إيه الشروط المطلوبة علشان توافقى عليه؟
- يابنتى ده قدك، فاهمة يعنى إيه قدك.. يعنى ده سبب كفاية إنى أرفضه
- وإيه المشكلة يعنى إنه قدى!!! هو لازم يعنى يكون أكبر منى علشان يكون شخص ناضج؟؟
- آه طبعا، مش أقل من عشر سنين فرق
- كااااااااااااااااااااااام!!!!
- هو كده، أنا ماقبلش فرق سن أقل من كده.. علشان يبقى فى مقام باباكى (ربنا بقى يجحمه مطرح ما راح) قصدى ربنا يرحمه.. علشان يقدر يحتويكى ويخاف عليكى
- ما أشوفلى أحسن واحد كان متجوز قبل كده، حتى يبقى خبرة برضه فى تحمل المسئولية، ومتجرب قبل كده فيكون واخد على الشقا
- بتتريقى؟ هااه، طيب اتريقى براحتك، بس هو كده إذا كان عاجبك ومش هاقبل كلام فى الموضوع ده تانى.. بلغيه رفضى الشديد
- مامــــ ....
- كلمة زيادة هامد إيدى عليكى
***********************************************
- هو خطيبك ماجاش النهاردة ليه؟؟ مش النهاردة الجمعة برضه ولا أنا غلطانة؟
- لأ يا ماما مش غلطانة، هو اعتذر علشان عمه فى المستشفى وأخته كمان بتولد
- وإيه يعنى؟ مش بقية العيلة معاهم!!
- إيه يعنى إزاى يا ماما، مش شايفة إن دى أسباب كفاية تمنعه من إنه ييجي؟
- لأ، لإن ده اليوم الوحيد اللى بيجى يشوفك فيه.. فمش كل مرة يطلع لنا بحجة شكل
- ما هو كان هنا يا ماما الجمعة اللى فاتت.. ولما بيقدر يجى فى وسط الأسبوع مش بيتأخر
- هو كلمك النهاردة؟ وللا إنتى بتدافعى عنه وخلاص!!
- لأ، كلمنى واعتذر لى وهايحاول يعوضها على بكرة أو بعده
- بس ماتكلمش إمبارح بليل، صح؟
- لأ، إنتى عرفتى منين؟
- ما أنا كنت سهرانة فى أودتى مركزة علشان أسمع رنة التليفون، وفضلت فاتحة عينى بالعافية لحد تلاتة الفجر ولما فقدت الأمل نمت
- وإيه المشكلة إنه مايتصلش؟؟ كان تعبان ونام بدرى
- يعنى إمبارح مايتصلش والنهاردة مايجيش.. ده مش بيحبك، أيوه، ما هو لو كان بيحبك كان خلاكى تكونى أول إهتمامته مش أخر حاجة يفكر فيها
- يا ماما يا حبيبتى هو اللى بيقدر عليه بيعمله، وبعدين اللى ملوش خير فى أهله يبقى ملوش خير فى خطيبته
- أكيد فى حاجة بينكم مش طبيعية.. أكيد ضايقك ولا سمم بدنك بكلامه.. قولى لى يا حبيبتى فضفضى لأمك حبيبتك
- والله أبدا يا ماما، إحنا زى السمنة على العسل.. كل الحكاية إن الظروف كلها جت ضدنا
- كدة؟؟؟ يعنى مفيش حاجة؟ طب لما نشوف بقى هايجى الأسبوع ده ويجيب حلاوة المولد وللا لأ!!
- مولد؟؟ ماما هو إنتى ليه محبكاها قوى كدة؟؟ ولو ماجابش!!
- لو ماجبش بقى يا حبيبتى هايبقى يومه أسود.. علشان دى عادات وأصول ماينفعش يخرج عنها
- فعلا؟؟؟ كده الجوازة باظت
***********************************************************
- حبيبى هو إنت خارج؟
- أيوة يا ماما، عايزة حاجة؟
- مادام لابس اللى على الحبل كدة يبقى طبعا رايح تقابل خطيبتك
- أه يا ماما، أسلملك عليها؟
- لأ، مالحقتش توحشنى، مش كانوا لسه عندنا من أسبوع
- أسبوع يا ماما يعنى سبعة أيام.. ولسه ماوحشتكيش؟؟ أمال هى ليه بتوحشنى وهى معايا ؟؟
- علشان بتحبها يا ديك البرابر.. ياعينى عليا بقى أنا أقعد أربى وأتعب وتيجى واحدة تاخدك على الجاهز كدة!
- هو إنتى هاتغيرى منها وللا إيه؟؟ عُمر ما حد يقدر ياخدنى منك أبدا يا ست الحبايب
- أيوة، أيوة، إبلفنى بكلمتين زي كل مرة وبعدها تسيبنى لوحدى وتنزل
- ما هى أختى قاعدة معاكى يا ماما.. لوحدك فين بس؟؟
- أديك قلت أختك، يعنى أبوك مش موجود.. هاتسيبنا كده من غير راجل وتنزل
- إيه يا ماما الزمن القديم ده؟؟ ليه محسسانى إننا أيام الأبيض والأسود
- أنا قلقانة على أبوك، خايفة ليكون جراله حاجة.. ما تشوفه كده فين؟
- اطمنى يا ماما، هو لسه مكلمنى وجاى فى الطريق.. ياللا أنا نازل
- أى أى أههه، الحقنى يابنى.. امسكنى حاسة إنى هاقع، ضغطى باين عليه وطى مرة واحدة، آهههه
- باظت الخروجة
***********************************************
- أنا مش فاهمة إنت مستعجل على الجواز كدة ليه؟ هى الدنيا هاتطير!!
- نفسى بقى أستقر يا ماما ويكون ليا بيت، إيه مازهقتيش منى ؟
- حد يزهق من ضناه برضه؟ لكن ماتجيش على نفسك قوى كده
- ما إنتى عارفة يا ماما إن الدنيا عمالة تغلى.. فاعايز ألحق أفرش الشقة بسرعة بسرعة
- لكن مايبقاش على حساب صحتك، مش مهم تتجوز دلوقتى لكن الأهم عندى إنت
- ماتقلقيش عليا يا حبيبة قلبى.. لو ماتعبناش وإحنا شباب كده هانتعب إمتى؟؟
- هو إنت يعنى هاتجيب فلوس منين، اللى مايخلصش النهاردة يخلص بكرة، يخلص السنة الجاية، وللا إن شالله عنه ما خلص خالص
- لأ لأ لأ، السنة الجاية مين... كله هايخلص السنة دى بإذن ربنا إن شاء الله
- أكيد خطيبتك وأهلها شغالين زن زن على ودانك
- والله إنتى ظلماهم خالص يا ماما، ده أنا اللى بزن عليهم علشان نسرع فى الجواز
- وبعدين إنت مش وراك مسئوليات تانية أهم؟
- قصدك الدكتوراة؟ ما أنا شغال فيها لكن دى حبالها طويلة.. أستقر الأول علشان أروق للدكتوراة
- هو أنتوا هاتروحوا إمتى تستلموا الشبكة؟
- الأسبوع الجاى إن شاء الله
- طيب كويس علشان أتفق مع أختك وخطيبها نيجى معاكم
- ليه يعنى؟ ما أنا هابقى أجيبهالكم تشوفوها
- مش علشان نشوفها، علشان أختك تختار شبكتها هى كمان
- هو يعنى الجواهرجية خلصوا؟ مفيش غير المكان اللى جبنا إحنا منه!
- وليه يعنى أتعب خطيب أختك معانا!! مادام المحل كويس وفى حاجات حلوة ليه يدور على غيره؟
- مممم، ماشى يا ماما على راحتك
- مش الشبكة بتاعتك كانت بخمستاشر ألف؟
- أه
- خلاص يبقى شبكة أختك ماتجيش بأقل من عشرين ألف
- أنا مش فاهم إنتى حاطانا فى دماغك ليه! وإفرضى ماكانش عامل حسابه؟
- مش مهم، أدفع أنا الفرق، يعنى هو أنا هاستخسر فى أختك.. المهم منظرها قدام الناس، وللا إيه؟
- حد قال حاجة، ربنا يهدى
** دى كانت حاجة بسيطة من اللى بتحصل ورا كل باب مقفول على عريس أو عروسة.. بس يا ترى يا هل ترى إيه اللى بيبوظ الجوازات دى من وجهة نظركم، لأ، أرجوكم أوعوا تفهمونى صح
رحاب المليــــــحي
- ماما، فى واحد معايا فى الشغل عايز يقابلك
- خير، إشمعنى؟
- عريس يا ماما أكيد
- عريس؟؟ وده عرفك منين؟ شكله إيه؟ مرتبه كام؟ عنده شقة وللا لأ؟ اتكلمى ساكتة ليه ؟؟
- هو حضرتك مديانى فرصة، قلت لك معايا فى الشغل.. كل اللى أعرفه عنه إن سُمعته كويسة فى الشركة.. لكن أى تفاصيل تانية تعرفيها بقى منه
- يعنى عايزة تقنعينى إنكم ماتكلمتوش فى أى تفاصيل؟!!
- لأ، كل الحكاية إنه قال لى إنه معجب بيا وإنه عايز ييجى يزورنا
- ممممم، ولو افترضنا إنى صدقتك.. افرضى ماكانش مستعد ماديا للجواز.. هاتوافقى عليه برضه لمجرد إن سمعته كويسه!!!
- ماما هو إنتى ليه بتسبقى الأحداث؟! ما تقابليه الأول وقرريه ووقعيه فى الكلام بقى بمعرفتك
- لما نشوف، ما جاب الغراب لأُمه
**********************************************
- هو ده بقى عريس الغفلة اللى انتى عايزة تتجوزيه؟؟ ليه إن شاء الله هو إنتى بايرة وللا بايرة وللا تكونى بايرة!!!
- مالك بس يا حبيبتى، إيه بس اللى مش عاجبك فيه؟
- إيه اللى مش عاجبنى!! قولى إيه اللى عاجبك إنتى فيه؟؟
- إبن حلال، وإبن ناس، يعنى ده على قد معرفتى البسيطة بيه
- وهى دى أسباب قوية تنجح الجوازة من وجهة نظرك؟؟ صحيح ما إنتى لسه عيلة مش فاهمة حاجة
- قوليلى إنتى يا ماما إيه الشروط المطلوبة علشان توافقى عليه؟
- يابنتى ده قدك، فاهمة يعنى إيه قدك.. يعنى ده سبب كفاية إنى أرفضه
- وإيه المشكلة يعنى إنه قدى!!! هو لازم يعنى يكون أكبر منى علشان يكون شخص ناضج؟؟
- آه طبعا، مش أقل من عشر سنين فرق
- كااااااااااااااااااااااام!!!!
- هو كده، أنا ماقبلش فرق سن أقل من كده.. علشان يبقى فى مقام باباكى (ربنا بقى يجحمه مطرح ما راح) قصدى ربنا يرحمه.. علشان يقدر يحتويكى ويخاف عليكى
- ما أشوفلى أحسن واحد كان متجوز قبل كده، حتى يبقى خبرة برضه فى تحمل المسئولية، ومتجرب قبل كده فيكون واخد على الشقا
- بتتريقى؟ هااه، طيب اتريقى براحتك، بس هو كده إذا كان عاجبك ومش هاقبل كلام فى الموضوع ده تانى.. بلغيه رفضى الشديد
- مامــــ ....
- كلمة زيادة هامد إيدى عليكى
***********************************************
- هو خطيبك ماجاش النهاردة ليه؟؟ مش النهاردة الجمعة برضه ولا أنا غلطانة؟
- لأ يا ماما مش غلطانة، هو اعتذر علشان عمه فى المستشفى وأخته كمان بتولد
- وإيه يعنى؟ مش بقية العيلة معاهم!!
- إيه يعنى إزاى يا ماما، مش شايفة إن دى أسباب كفاية تمنعه من إنه ييجي؟
- لأ، لإن ده اليوم الوحيد اللى بيجى يشوفك فيه.. فمش كل مرة يطلع لنا بحجة شكل
- ما هو كان هنا يا ماما الجمعة اللى فاتت.. ولما بيقدر يجى فى وسط الأسبوع مش بيتأخر
- هو كلمك النهاردة؟ وللا إنتى بتدافعى عنه وخلاص!!
- لأ، كلمنى واعتذر لى وهايحاول يعوضها على بكرة أو بعده
- بس ماتكلمش إمبارح بليل، صح؟
- لأ، إنتى عرفتى منين؟
- ما أنا كنت سهرانة فى أودتى مركزة علشان أسمع رنة التليفون، وفضلت فاتحة عينى بالعافية لحد تلاتة الفجر ولما فقدت الأمل نمت
- وإيه المشكلة إنه مايتصلش؟؟ كان تعبان ونام بدرى
- يعنى إمبارح مايتصلش والنهاردة مايجيش.. ده مش بيحبك، أيوه، ما هو لو كان بيحبك كان خلاكى تكونى أول إهتمامته مش أخر حاجة يفكر فيها
- يا ماما يا حبيبتى هو اللى بيقدر عليه بيعمله، وبعدين اللى ملوش خير فى أهله يبقى ملوش خير فى خطيبته
- أكيد فى حاجة بينكم مش طبيعية.. أكيد ضايقك ولا سمم بدنك بكلامه.. قولى لى يا حبيبتى فضفضى لأمك حبيبتك
- والله أبدا يا ماما، إحنا زى السمنة على العسل.. كل الحكاية إن الظروف كلها جت ضدنا
- كدة؟؟؟ يعنى مفيش حاجة؟ طب لما نشوف بقى هايجى الأسبوع ده ويجيب حلاوة المولد وللا لأ!!
- مولد؟؟ ماما هو إنتى ليه محبكاها قوى كدة؟؟ ولو ماجابش!!
- لو ماجبش بقى يا حبيبتى هايبقى يومه أسود.. علشان دى عادات وأصول ماينفعش يخرج عنها
- فعلا؟؟؟ كده الجوازة باظت
***********************************************************
- حبيبى هو إنت خارج؟
- أيوة يا ماما، عايزة حاجة؟
- مادام لابس اللى على الحبل كدة يبقى طبعا رايح تقابل خطيبتك
- أه يا ماما، أسلملك عليها؟
- لأ، مالحقتش توحشنى، مش كانوا لسه عندنا من أسبوع
- أسبوع يا ماما يعنى سبعة أيام.. ولسه ماوحشتكيش؟؟ أمال هى ليه بتوحشنى وهى معايا ؟؟
- علشان بتحبها يا ديك البرابر.. ياعينى عليا بقى أنا أقعد أربى وأتعب وتيجى واحدة تاخدك على الجاهز كدة!
- هو إنتى هاتغيرى منها وللا إيه؟؟ عُمر ما حد يقدر ياخدنى منك أبدا يا ست الحبايب
- أيوة، أيوة، إبلفنى بكلمتين زي كل مرة وبعدها تسيبنى لوحدى وتنزل
- ما هى أختى قاعدة معاكى يا ماما.. لوحدك فين بس؟؟
- أديك قلت أختك، يعنى أبوك مش موجود.. هاتسيبنا كده من غير راجل وتنزل
- إيه يا ماما الزمن القديم ده؟؟ ليه محسسانى إننا أيام الأبيض والأسود
- أنا قلقانة على أبوك، خايفة ليكون جراله حاجة.. ما تشوفه كده فين؟
- اطمنى يا ماما، هو لسه مكلمنى وجاى فى الطريق.. ياللا أنا نازل
- أى أى أههه، الحقنى يابنى.. امسكنى حاسة إنى هاقع، ضغطى باين عليه وطى مرة واحدة، آهههه
- باظت الخروجة
***********************************************
- أنا مش فاهمة إنت مستعجل على الجواز كدة ليه؟ هى الدنيا هاتطير!!
- نفسى بقى أستقر يا ماما ويكون ليا بيت، إيه مازهقتيش منى ؟
- حد يزهق من ضناه برضه؟ لكن ماتجيش على نفسك قوى كده
- ما إنتى عارفة يا ماما إن الدنيا عمالة تغلى.. فاعايز ألحق أفرش الشقة بسرعة بسرعة
- لكن مايبقاش على حساب صحتك، مش مهم تتجوز دلوقتى لكن الأهم عندى إنت
- ماتقلقيش عليا يا حبيبة قلبى.. لو ماتعبناش وإحنا شباب كده هانتعب إمتى؟؟
- هو إنت يعنى هاتجيب فلوس منين، اللى مايخلصش النهاردة يخلص بكرة، يخلص السنة الجاية، وللا إن شالله عنه ما خلص خالص
- لأ لأ لأ، السنة الجاية مين... كله هايخلص السنة دى بإذن ربنا إن شاء الله
- أكيد خطيبتك وأهلها شغالين زن زن على ودانك
- والله إنتى ظلماهم خالص يا ماما، ده أنا اللى بزن عليهم علشان نسرع فى الجواز
- وبعدين إنت مش وراك مسئوليات تانية أهم؟
- قصدك الدكتوراة؟ ما أنا شغال فيها لكن دى حبالها طويلة.. أستقر الأول علشان أروق للدكتوراة
- هو أنتوا هاتروحوا إمتى تستلموا الشبكة؟
- الأسبوع الجاى إن شاء الله
- طيب كويس علشان أتفق مع أختك وخطيبها نيجى معاكم
- ليه يعنى؟ ما أنا هابقى أجيبهالكم تشوفوها
- مش علشان نشوفها، علشان أختك تختار شبكتها هى كمان
- هو يعنى الجواهرجية خلصوا؟ مفيش غير المكان اللى جبنا إحنا منه!
- وليه يعنى أتعب خطيب أختك معانا!! مادام المحل كويس وفى حاجات حلوة ليه يدور على غيره؟
- مممم، ماشى يا ماما على راحتك
- مش الشبكة بتاعتك كانت بخمستاشر ألف؟
- أه
- خلاص يبقى شبكة أختك ماتجيش بأقل من عشرين ألف
- أنا مش فاهم إنتى حاطانا فى دماغك ليه! وإفرضى ماكانش عامل حسابه؟
- مش مهم، أدفع أنا الفرق، يعنى هو أنا هاستخسر فى أختك.. المهم منظرها قدام الناس، وللا إيه؟
- حد قال حاجة، ربنا يهدى
** دى كانت حاجة بسيطة من اللى بتحصل ورا كل باب مقفول على عريس أو عروسة.. بس يا ترى يا هل ترى إيه اللى بيبوظ الجوازات دى من وجهة نظركم، لأ، أرجوكم أوعوا تفهمونى صح
رحاب المليــــــحي
