أنا فين؟! الحلقة السادسة

- هو أنا لسه هنا؟؟؟ آه صحيح ما هو قال لى ست سنين، يا من يعيش بقى!!!

- ملوكة، مش هاتطلعى تقعدى مع الناس؟

- ناس مين؟

- الناس اللى جايين يباركولك علشان ولادة ياسمين

- هو أنا ولدت خلاص؟؟ ويا ترى بقى المرة دى إنت حضرت الولادة؟

- إحممم، بتقولى حاجة يا حبيبتى؟

- آه ... بسألك حضرت الولادة المرة دى؟

- والله، أصل يعنى، أصل الحقيقة......

- هاااااااااه

- أصل إنتى عارفة طبعا إن الركنة مش بالساهل فى البلد دى.. فأنا وصلتك المستشفى إنتى ومامتك.. وبعدين روحت البيت علشان ماخدش مخالفة.. طبعا مايرضيكيش إنى آخد مخالفة.. مش كدة؟؟

- هااااه كمل وبعدين؟

- وبعدين يا ستى لما روحت البيت.. قوووم إيه، باباكى كان عايز يروحلك وطبعا يارا.. بس إنتى كنتى قايلالى إن يارا متروحلكيش المستشفى غير بعد الولادة علشان ماتقعدش تعيط وإنتى بتتوجعى.. فأنا قلت لباباكى يستنى لحد لما إنتى تتصلى تقولى إنك خلاص داخلة أوضة العمليات.. وأهى مامتك معاكى فمفيش قلق.. بس تقريبا كدة راحت عليا نومة

- جرررررررررررررررررررررر

- فاإنتى لما إتصلتى كنت فاكر نفسى بحلم.. بس إنتى كنتى ولدتى خلاص.. سألتك جبتى إيه؟ قلت لى بعصبية إنك جبتى ياسمين.. على طول متعصبة يا حبيبتى مش عارف ليه؟؟

- أاه، ففوقت بقى ساعتها وجبتهم وجيت؟!!!

- أيوة، بالظبط كدة.. برافو عليكى

- إيه ماخوفتش لحسن تاخد مخالفة؟

- لأ، ما أنا قلت بقى أدفع بتاع نص ساعة كده فى الركنة وأمرى لله أطمن عليكى وأروح.. قصدى أروح العربية وآجي بالأتوبيس أو نروح كلنا سوا

- جررر، وإنت عايز إيه دلوقتى؟

- مادام ياسمينا نايمة قومى اقعدى مع الناس برة

- طيب، هى ماما فين؟

- فى المطبخ بتعمل لك أكل

- يا سبحان الله، فى يارا كان أكلى كله تيك أواى وكنت قاعدة عند رنا فى بيتها علشان ماكانش فيه حد ياخد باله منى.. فى ياسمين كل الناس حواليا وقاعدة معززة مكرمة فى بيتى

- مفيش حاجة بتفضل على حالها.. أديكى بتاخدى خبرة فى الحياة عموما من كل ناحية

- ده أنا يتعمل لى تمثال على كل اللى جرالى من ساعة ما اتغربت ولسه.. الله أعلم بكرة مخبيلى إيه

- كل خير إن شاء الله.. بس ياللا بقى قومى

*******************

- يارا، يارا

- في إيه يا ملك؟ مالها يارا؟

- البنت حرارتها عالية وعمالة تصحى تنده عليا وتروح خالص مش حاسة بحاجة

- طيب أنا هاخدها المستشفى

(بعد ساعة)

- هاااه طلع عندها إيه؟

- محدش شافها.. الممرضة قالت لى شكله شوية برد.. إديها حاجة سخنة وهى تبقى كويسة

(بعد يومين)

- مش هاينفع اسكت على البنت أكتر من كده.. دى سخنة مولعة ومش راضية حتى تاكل

- خلاص هاخدها المستشفى تانى قسم الطوارىء

- أيوة لازم، ما إحنا مانقدرش نديها مضاد حيوى من غير روشتة

(بعد أربع ساعات)

- حد شافها المرة دى؟

- فضلت واخد دورى تلات ساعات لحد ما الدكتور شافها

- تلات ساعات؟؟؟ والناس فاكرة إن طب لندن ياما هنا ياما هناك.. ييجوا يشوفوا البنت مولعة وتقعد فى الطوارىء تلات ساعات علشان حد يشوفها.. المهم قال لك إيه؟

- قال لى تقريبا عندها اللوز.. وإدانى الدوا دة

- كل ده علشان البقين دول.. يعنى تلات ساعات علشان ناخد المضاد الحيوى وياريتها إزازة كاملة.. دول يا دوب بقين.. يارب بس يكون فيهم الشفا

(بعد عشر ايام)

- أنا مش مصدقة إن يارا اقعدت عشر أيام عندها إمساك لحد ما أحنا اللى اتصرفنا

- مامتك بتقول إنها حالة نفسية.. لإنها كمان حصلت بعد ما جت ياسمينا على طول

- ما أنا متهيألى كدة برضه.. لإنها شايفة الناس جاية تبارك وتجيب هدايا لياسمين والكل مهتم بيها وهى ماحدش معبرها يا حرام خالص

- لازم ناخد بالنا من الموضوع دة فى المستقبل علشان مايأثرش عليها نفسيا

- آه طبعا.....

- مالك بس مكشرة ليه؟

- الأيام الحلوة بتعدى قوام.. شفت الشهر اللى بابا وماما هنا فيه قرب يخلص خلاص .. أما الأسبوعين اللى أخويا قعدهم كانوا زى الحلم.. من واحد ساكن فى الشقة اللى فوقنا فى مصر وعلى طول معانا.. لواحد ماشفتوش تلات سنين.. تلات سنين؟؟؟ مش مصدقة بجد.. وربنا العالم هاشوفه تانى إمتى؟؟

- بس الحمد لله إنك شوفتيه واطمنتوا على بعض.. وزى ما المقابلة دى كانت مفاجئة وجت بترتيب ربنا.. إن شاء الله تشوفوا بعض تانى وتالت

***********

- عندى ليكى خبر نص كم؟

- خيييييير إتحفنى بأخبارك

- جالنا جواب طرد

- نعم؟؟؟

- علشان فيه مشاكل كتير فى الشقة.. فهما عايزين يفضوا المبنى خالص علشان يصلحوه

- آه ما أنا عارفة.. بقالى سنتين فى الشقة دى نفسى أعرف إزاى لما الدنيا بتمطر السقف بينقط وإحنا فوقينا دورين!! بس هايودونا فين بقى المرة دى إن شاء الله؟

- الله أعلم إحنا وحظنا.. إدعى يكون حظنا حلو

- آااه يااااانى.. هو أنا إمتى هاستقر بقى فى البلد دى ويبقالى بيتى؟؟ كل ما أقول خلاص استريحت.. تطلع لى حاجة جديدة فى المقدر تنكد عليا

- لأ وأسوأ حاجة هى العزال.. وكمان دلوقتى بقى فيه عفش وحاجات كتير.. مش زى من سنتين ماكانش فيه غير هدومنا

- ربنا يستر بقى.. وهايطردونا إمتى؟

- إنتى عارفة دول حبالهم طويلة.. والروتين عندهم يشلللللللل

- طيب أنا هانزل بقى أعمل شوية شوبينج لحسن نفسيتى تعبت

- آه يا نفسيتى أنا يااانى.. آااه يا جيبى اللى جنب قلبى ياانى أاااه

- فى حاجة تعباك يا حبيبى؟؟

- لأ أبدا خالص نهائى

(بعد شهرين)

- قرار الطرد أهو جه بقرار من المحكمة

- إمتى؟

- كمان أسبوع

- والحكومة لسه مجبتلناش مكان تاني؟

- لأ

- طب وبعدين؟

- مش عارف، بس أكيد كالعادة هايستنوا لآخر دقيقة ويكلمونا

- وافرض ماعجبتناش؟

- ملهاش حل.. لازم نرضى باللى هايجيبوه مينفعش نتنك

(بعد أسبوع)

- أخيرا كلمونى علشان نروح نشوف شقة

- هاااااه وموقعها فين؟

- مش بعيدة عن هنا الحمد لله

- يارب بس تتطلع كويسة.. هى كم أوضة؟

- مش عارف ماقالوش أى تفاصيل.. بس أكيد أوضتين برضه

- ربنا يستر لحسن ده الطرد خلاص بعد بكرة ونبقى فى الشارع

(وجه بكرة)

- إيه رأيك .. الشقة ظريفة.. مش كده؟

- مش بطالة، هى اللى إحنا فيها كانت أحلى لكن ما باليد حيلة

- بس الحمد لله إنتى كنتى مرعوبة لحسن نروح فندق تانى وللا شقة أى كلام

- الحمد لله على كل شىء، بس برضه دى لسه مش شقتنا

- آه وبرضه لسه مش عارفين شقتنا هاتيجى إمتى

- أوحش حاجة الانتظار والعزال والخوف من اللى جى وإلخ إلخ

- أدينا إتعودنا على الهم والخوف ... والمشاكل خدت منا راقات.. وأدينا بناخد خبرة أكتر وأكتر فى الحياة.. بذمتك لو كنتى عايشة فى مصر جنب أهلك.. كنتى هاتقدرى تتحملى المسئولية زى ما إنتى هنا؟

- لأ طبعا، أنا معاك.. لكن الرحمة حلوة برضة.. مش كل ما أقول خلاص هاستريح ألاقى ضربة تانية مش عارفة جايالى منين

- سيبيها على الله وهو مش هايجبلنا أبدا حاجة وحشة.. أهم حاجة الرضا.. إنك ترضى باللى ربنا قاسمهولك.. ساعتها كل حاجة هاتهون وكل حاجة وحشة هاتشوفى الجانب الكويس اللى فيها.. وبصى دايما على نص الكوباية المليان وإوعى تبصى على نصها الفاضى وإنتى تعيشى راضية ومبسوطة.. إتفقنا؟

- هاحاول أرضى بحالى وأحمد ربنا عليه.. بس أكيد ده هياخد شوية وقت

- بس غريبة يعنى بقالك كتير مش بتكلمى صحابك على النت.. إيه اللى حصل فى الدنيا؟؟؟

- هه، لأ ابدا بس مليش مزاج اقعد على النت.. فيها حاجة دى؟؟ ;-)

رحاب المليـــــــحي

أنا فين؟! الحلقة الخامسة

- لااااااااااااااااااااااااااا
- فوقى يا ملك، ملك إصحى، يارا بخير
- هه، أنا فين؟
- إنتى فى بيتك يا حبيبتى.. إهدى وفوقى وكله هيبقى كويس إن شاء الله
- بيتى؟ هو إحنا خلاص سيبنا الفندق؟
- آه الحمد لله، جابونا فى شقة جميلة.. مش أنا قلت لك آخرة صبرنا هاتكون خير
- ههههه، يعنى دى خلاص شقتنا ومش هانعزل تانى؟
- احممم، الحقيقة لأ
- لأ؟؟؟؟ يعنى إيه لأ؟ انا بقالى تلات سنين عايشة فى لندن.. كل شوية نروح مكان.. هانستقر إمتى بقى إن شاء الله؟؟
- فاضل خطوة كمان إن شاء الله ونبقى فى شقتنا.. دى أصلها شقة مؤقتة كده لحد ما يلاقولنا شقة تبقى بتاعتنا
- آه إذا كان كده معلش.. يعنى قصدك كمان ست أسابيع كده مثلا ونروح شقتنا؟
- ست سنين كدة يا حياتى
- نعمممممممم؟ ست إيه؟؟؟
- أصل أنا سألت الجيران اللى حوالينا قالوا لى محدش بياخد شقته قبل ست أو سبع سنين
- "هاقعد فى الشعاع ست سنين.. ده أنا أكون اتحللت"
- بتقولى حاجة يا ملوكتى؟
- لأ أبدا، ...... بس عموما الشقة حلوة.. يعنى مايضرش إنى اقعد فيها فترة طويلة
- آه الحمد لله، إحنا كنا فين وبقينا فين
- هى يارا فين؟
- نايمة فى أوضتها.. ما هو الحمد لله بقى عندها أوضة واسعة فيها كل لعبها
- هو أنا ليه زورى واجعنى؟ هو أنا كنت بزعق وأنا نايمة؟
- لاااأ، كنتى بتصرخى بس.. لسه مش قادرة تنسى منظر يارا وهى بتقع قدامك من أول دور
- بتقع منيييييييين؟ هو إيه اللى حصل؟
- كنا بنفطر عند ريم فى رمضان.. ويارا كانت واقفة عند السلم الداخلى بتاع الشقة من جوة.. وماكناش واخدين بالنا إن درابزين السلم فيه كام واحدة مش موجودين.. علشان الهانم كانت قال إيه مغطية اللى مش موجود بفوطة.. فالبنت فضلت ترجع لورا لحد ما فجأة ملقينهاش.. وقعت حوالى تلاتة متر لتحت نزلت على أول سلمة
- هااااه وبعدين؟ جرالها حاجة؟
- الحمد لله ربنا قدر ولطف.. هى طبعا من المفاجأة والخضة كانت عمالة تعيط ومش قادرة تقف على رجليها.. وبتعيط أكتر على عياطك.. إنتى بقى اللى كنتى منهارة تماما والحمد لله إن مجرالكيش حاجة علشان كمان البيبى اللى فى بطنك وإنتى فى الشهر الخامس.. قعدتى تصرخى وتقولى اطلبوا الإسعاف.. جت الإسعاف أخدتها وجرينا بيها على المستشفى.. ماكنتش عايزانى اشيلها خالص كانت عايزاكى إنتى بس.. بس علشان كانوا بيعملولها أشعة مقطعية على كل جسمها فكان لازم إنتى تكونى بعيدة علشان الحمل.. بس الحمد لله مالقوش فيها حاجة هو اللى خوفهم كمان إنها راجعت دم.. بس ده علشان قبل الواقعة على طول كانت بتاكل
- روحنا بعدها؟
- لأ، كان لازم تقعد 24 ساعة تحت المراقبة.. فإنتى اللى كنتى معاها بيتوا فى المستشفى.. جبتلك الأكل علشان تتسحرى.. وقضيتوا الليلة دى فى المستشفى لوحدكم.. وهى رجعت لطبيعتها.. لكن إنتى اللى اقعدتى تتعالجى بالمسكنات تلات أيام بعدها من الخضة.. وكل ما تحكى لحد اللى حصل تقعدى تعيطى.. منظرها وهى بتقع مش عايز يروح من بالك
- يا حبيبتى يا يارا، الحمد لله فعلا.. ده لو كان واحد كبير وقع المسافة دى كلها كان لازم حاجة فيه تتكسر.. أكيد هى وقعت من هنا وفيه ملاك مسكها لحد ما وصلها للأرض..... هو أنا حامل؟
- آه يا حبيبتى.. وإن شاء الله ميعاد ولادتك هيكون تقريبا يوم عيد ميلادك.. ومامتك وباباكى وأخوكى ناوين ييجوا يحضروا الولادة علشان ماتكونيش لوحدك
- بجد؟؟ الله دى هاتبقى لمة حلوة أوى.. ياااه ده أنا ماشوفتش أخويا من ساعة ما اتجوزت.. ويارا بقى عندها سنة ونص دلوقتى ولسه هو ماشفهاش
- على فكرة صحيح محدش جى النهاردة عندنا على الفطار
- ده رمضان هنا كئيب جدا.. لازم يبقى فيه لمة غير كده تحس إنك وحيد.. حتى الأذان بنسمعه بس من على الكمبيوتر.. والتراويح مش بقدر أروح معاك أصليها علشان يارا بتعمل دوشة وبخاف تشوشر على الناس.. فتقريبا مش بحس به خالص
- ربنا يسهل ونقدر فى سنة من السنين نقضيه فى مصر إن شاء الله.. المهم ما تيجى نخرج شوية فرصة الشمس طالعة والجو حلو
- هانروح فين؟؟
- ياه يا ملك نفس السؤال بتسأليه كل مرة.. هانروح فين؟ أقولك تعالى نروح عند أصحابنا.. تقولى لأ، هانزل أروح من بيت لبيت يبقى فين الخروجة.. تعالى طيب نروح الجنينة.. روحتها مية مرة إيه الجديد.. بلاش تعالى نتغدى برة... مليش مزاج.. وفى الآخر تعكننى علينا ونفضل قاعدين فى البيت.. وتقعدى تأفئفى وتتعصبى وتبقى زهقانة ومش طايقة نفسك..
- كل ده علشان سألتك سؤال؟؟
- أصل دة الحوار اللى بيحصل كل مرة.. وفى الأخر النتيجة واحدة مش بتتغير.. علشان إنتى مش بتحبى نخرج لوحدنا عايزة دايما نخرج شلة.. ومش دايما الناس ظروفها بتسمح.. فتعكننى علينا وتتعصبى وتقولى خلاص مش خارجة.. وتطلعى عصبيتك على البنت.. لازم تكونى مرنة شوية يا ملك يا حبيبتى.. مش لازم يا إما اللى على مزاجك يا إما خلاص
- أووووف، أساسا الحياة هنا مملة جدا ومفيش حاجة تتعمل.. وأنا زهقت من القعدة ... العيشة هنا تزهق من غير لا شغلة ولا مشغلة.. أنا ماكانش طموحى إنى أقعد فى البيت أربى البنت وأنضف وأكنس وأغسل.. عمرى ما حلمت بالعيشة دى ولا حلمت حتى إنى أتغرب
- هو أنا مانعك من الشغل؟ ما تشتغلى بس هاتشتغلى إيه؟ إنتى تخصصك برمجة وإنتى بتكرهى البرمجة وسيرتها.. عايزة تبقى صحفية بس المجال ده مش متوفر هنا كتير.. واللى موجود سياسة وإنتى برضه بتكرهي السياسة.. قلت لك أشوفلك شغل فى الفندق عندنا فى الاستقبال وللا فى أى مجال.. مجرد حاجة مبدئية لحد ما تثبتى نفسك وبعدين تترقى أو تختارى مجال أحسن.. رفضتى قلتى برستيجك مايسمحلكيش إنك تشتغلى الشغلانات دى.. خلاص مطلوب منى أعمل إيه يعنى؟؟
- ماتعملش حاجة، أنا داخلــــة ....
- تقعدى على النت.. ما أنا مش باخد منك غير كدة، طول اليوم قاعدة ترغى مع أصحابك وخلاص.. ولما آجى أتكلم معاكى أصلى زهقانة أصلى مصدعة عايزة أنام.. براحتك خلاص اعملى اللى إنتى عايزاه أنا برضه زهقت
- الصبر من عندك يارب.. يارب نفسى أريح وأستريح.. ماتاخدنيش يا شعاع على طول لمكان تانى ودنيا تانية يمكن استريح فيها ؟؟؟.. شعاااااااااااااااااااااااااااااااع
رحاب المليـــــــــحي

أنا فين؟! الحلقة الرابعة

- هااااوم، أنا نمت كتير وللا إيه؟!!!
- صح النوم يا حبيبتى.. نمتى كويس؟
- آه الحمد لله، إيه ده هو إحنا خلاص روحنا بيتنا الجديد؟
- لأ يا ملك، إحنا قاعدين فى بيت كريم صاحبى
- قاعدين عنده ليه؟ وهو فين؟
- هو سافر مصر.. بصراحة سفره دة جه فى وقته
- مش فاهمة حاجة
- أصل بعد لما خلصوا الست اسابيع فى الفندق اللى ماكنش عاجبك.. ماكانتش لسه الحكومة شافت لنا مكان نقعد فيه.. فنقلونا لفندق تانى أحسن بكتير.. الأوضة عاملة زى الأستديو فلات جواها الحمام والمطبخ
- طيب ده كلام جميل.. إيه بقى اللى مقعدنا عند صاحبك؟
- علشان فرصة البيت فاضى وفيه إنترنت ودش عربى وكمان فيه غسالة.. فمش محتاجين كل كام يوم ننزل الشارع علشان نغسل هدومنا
- ممممم، والمفروض إننا هنقعد هنا قد إيه؟
- ممكن لحد ما كريم يرجع إن شاء الله
- أنا زهقت بقى من المرمطة اللى إحنا فيها دى.. صحيح من خرج من داره ......
- اصبرى يا ملك.. إن شاءالله آخرتها خير، بكرة تقولى محمد قال.. مش إنتى بتثقى فيا؟
- مش دايما يعنى بس ماشى
- بقى كده، ماشى يا ملك.. بكرة نقعد نفتكر الأياد دى ونضحك عليها
- شم،شم،شم، هو فى حاجة بتتحرق وللا أنا متهيألى؟
- آاااااه، ده أنا كنت معلى النار على الأكل علشان يستوى بسرعة.. بس يارا كانت بتعيط فكنت عايز أشوفها مالها ونسيت أوطى على النار
- هى هى، طب روح يا فالح اطفى البوتوجاز قبل ما تولع فى البيت، ده عُهدة
- ...............
- عارفة يا ملك، برغم انك اتبهدلتى كتير قوى فى البلد دى من ساعة ما جيتى.. وانهارتى وصعبت عليكى نفسك وكرامتك كتير برضه.. لكن صمدتى وكنتِ خير زوجة يعتمد عليها
- كرامتى؟؟ وإيه اللى جه على كرامتى؟
- يعنى مثلا فى الفندق اللى كنا قاعدين فيه قبل كده.. ماكنتيش قادرة تصدقى إنك تنتقلى من شقة بجنينة لفندق شبه بدروم.. وكنتِ من صباحية ربنا تاخدى يارا وتسيبى الأوضه علشان مايجلكيش اكتئاب.. وتقعدى تلفى فى الشوارع وتروحى يوميا عند بسمة صاحبتك علشان تطبخى لنا.. لإنك كنتِ بتقرفى تستخدمى المطبخ الجماعى اللى فى الفندق.. وبسمة برضه برغم إنها كانت بتحاول تساعدك فى إنها تسيب لك البيت كل يوم تعيشى فيه براحتك وتخرج هى لدراستها إلا إنك برضه ماكنتيش مرتاحة.. تقعدى تنضفى البيت علشان كان على طول مش نضيف ويارا بتزحف فكنت بتخافى إنها تاخد أى حاجة من الأرض.. وكنتِ متخيلة إن بسمة لما ترجع هاتشكرك على إنك نضفتى البيت.. لكن دائما كان رد فعلها بارد وكأنك معملتيش أى حاجة.. وكان ده بيجرحك وبيجى على كرامتك قوى.. وكنتِ صابرة ومستحملة
- ....... ساعات بيجى منى برضه.. كانت ماما دايما تقول لى برغم إنك مدلعة لكن وقت الجد بتصمدى وتستحملى وتكونى بمية راجل.. واضح إن ماما كان عندها حق
- ربنا يخليكى ليا، هى يارا فين؟ أنا مش سامع لها صوت
- ولا أنا برضه..... إيه ده؟ دى نايمة ورا الباب
- هاهاها، بنزينها لما بيخلص بتتقلب فى أى مكان
- هى يارا بقى عندها قد إيه دلوقتى؟
- يارا عيد ميلادها الأولانى كمان اسبوع
- ياااااه الوقت جرى بسرعة.. طيب هانعمل لها عيد ميلادها فين؟
- هو لازم يعنى؟ مش مهم السنة دى.. وبعدين أنا مش مقتنع بأعياد الميلاد أساسا.. حد يحتفل إن سنة فاتت من عمرهُ؟
- نعم؟؟ أنا بحب اللمة وأعياد الميلاد مناسبة حلوة تلم فيها الناس.. وأنا إن شاء الله مش هفوت عيد ميلاد لها من غير ما اعمله.. أنا كنت بعمل عيد ميلادى لحد ما اتجوزت.. هااه بقى هانعمله فين؟
- ممممم، نعمله هنا.. بس طبعا الأول لازم نستأذن كريم
- أكيد طبعا، صحيح هى هدومى فين؟
- ما إحنا مش جايبين هنا هدوم كتير
- آه يعنى قصدك أن بقية الهدوم فى الفندق التانى
- لأ، مش كلها.. الحاجات الضرورية بس.. لكن بقية الحاجات كلها مقسمينها على تلات أماكن
- إزاى يعنى؟
- يعنى لما بدأنا ننقل ماكنش ينفع كل حاجتنا اللى كانت معانا فى الشقة ناخدها معانا الفنادق.. ما هو الأوضه يا تاخدنا يا تاخد حاجتنا
- آه فـــــ إيه بقى؟
- فحطيناهم فى شنط.. وفرقنا الشنط على تلاتة من أصحابى اللى عندهم شقق.. لحد ما ربنا يكرمنا بشقة إن شاء الله
- طيب أنا .......
(تك تك تك)
- ده تلاقيه علي؟
- وعرفت منين؟
- ما هو عايش هنا يا ملك
- فعلا؟؟ ليه؟
- ما هو كريم صاحبنا مأجرله أوضه هنا.. ما هى الشقة تلات أوض، فأوضة منهم علي واخدها
- اللى يشوف كده يقول إن الأوض يرمح فيها الخيل.. دى كل أوضة متر فى متر ونص
- عادى يا ستى واحنا مالنا، كله مستفيد.. كريم عايز حد يساعده فى إيجار البيت وعلي عايز مكان مايكنش غالى قوى
- آاااه فهمت، نظام فيد واستفيد.. طيب روح افتح بقى وأنا هدخــــــ
- إوعى تقول لى هتدخلى تقعدى على الإنترنت.. البسى الطرحة وتعالى اقعدى معانا علشان نتغدى سوا
- أووووف، طيب............ مش هياخد باله، هاقعد شوية على النت واروحلهم على طوووووووووول.. شعاااااااااااااااااااااااااااع
رحاب المليـــــحي