الغربة وتوابعها

**لو رجع بيكى الزمن.. تعيشى ف مصر وللا ف لندن؟ إنتى حاسة بغربة أكتر فى مين فيهم؟ يا بختك هو حد لاقى العيشة دى!! **

ياااااااه تقريبا بقالى ست سنين بتسأل نفس الأسئلة وبسمع نفس الكلام ده.. مبدائيا الزمن مبيرجعش.. ماكنش حد غلب وكنا غيرنا فى نفسنا وحياتنا حاجات كتير قوى يمكن مش راضين عنها دلوقتى..

لكن لو أفترضنا إنه حصل أحب أعيش فين؟ المشكلة اللى بوجهها ويمكن ناس كتير متغربين عندهم نفس المشكلة.. أولا إن الواحد بيوصل لمرحلة لا عارف يعيش في بلده كونه مصرى ولا كمان عارف يعيش فيها إنجليزى (أو أى جنسية تانية)..

بمعنى إنك لما ترجع مصر بتكون مُشتت مش بس علشان حال البلد عمال يسوء وحزنك عليها لإنها بلدك الأم.. لكن علشان ساعات بتحس إنك بقيت ضيف فيها.. ضيف ف بيت أهلك.. ضيف على أصحابك وناسك.. ضيف حتى على أوضة نومك اللى قضيت فيها أحلى سنين عمرك.. أول ليلة لرجوعك مصر وفى أوضتك وع سريرك مش بتعرف تنام.. آه وحشتك، آه عمال تتفرج ع كل ركن فيها وكأنك بتملى نظرك من جدرانها وحاسس إنك كنت مفتقد جزء كبير من ذكرياتك.. آه نايم كمان ع سريرك اللى ياما عملت ع روحك فيه وإنت صغير.. لكن برضه حاسس نوعا ما بغربة.. مهو مابقاش سريرك اللى متعود عليه دلوقتى.. حتى ده بقيت ضيف عليه.. بتزوروه ف السنة مرة

بجد بتوصل لمرحلة إنك لا قادر تعيش ف بلدك ولا قادر تعيش ف البلد التانية.. كدة كدة تعبان وزهقان وحاسس إن فى حاجة ناقصاك سواء هنا وللا هناك.. كدة كدة مخنوق حزين مجروح.. جواك مشاعر كتير متداخلة مترابطة.. في حاجة غلط.. إيه هى! مش عارف.. فى جواك طير محبوس جوا القفص.. حتى لما بتفتح له الباب مش قادر يخرج منه.. لإنه لو خرج مش عارف هيروح على فين.. يبقى خليه محبوس أحسن.. أهو القفص اللى يعرفه .........

أسوأ معنى للغربة بجد لما تكون جاية من جواك حاسس بيها بكل معانيها.. لما تحس إنها كانت السبب الرئيسى إنها تموت حاجات كتير حلوة جواك.. لما تكسرك، لما تهدك.. لما يبقى كل حاجة حواليك شايفها زى بعض.. لما تبقى خايف تتعب لحسن ماتلقيش اللى ينولك كوبية مية.. لما تبقى خايف تفرح لحسن اللى حواليك يحسدوك ويبصولك حتى فى فرحك.. لما تقعد بالأسبوع تليفونك مش بيرن ولا حد بيسأل عليك يشوفك لسه عايش وللا......

لما تكسرك الوحدة.. مه مش شرط تكون عايش وحيد علشان تحس بالوحدة.. كتير بيكون حولنا ناس لكن مش حاسين بيهم مش شايفنهم.

غير ده كله ولو تغاضينا عن الحاجات دى كلها.. تيجى بقى مشكلة إنك تحس إن الأحداث اللى حوليك بتتغير والدنيا ماشية بسرعة البرق.. وناس تموت وناس تعيش.. والناس اللى تعرفهم فى بلدك هما هما.. واقفين فى نفس المكان (محلك سر).. بيتكلموا فى نفس الحوارات.. تحس إنك عايش فى فيلم هندى.. مهما غيبت عنهم مش هتحس إن فاتك حاجة.. الإختلافات تكاد تكون معدومة أساسا.. ولما تقولهم كدة أو تلفت نظرهم تشوف نظرة غضب ف عينهم.. اللى هو قصدك إيه يعنى؟ هو علشان سافرت وشفت الدنيا هتيجى تتنطط علينا!! ماشى يا عم الله يسهلك.

حتى التفكير بطبيعة الحال بيختلف.. يعنى وانت وسط أهلك ومعتمد عليهم وعارف إن مهما حصل هتجرى عليهم هيساعدوك.. طبيعى جدا إن كل ده بيتغير فى اللحظة اللى بتفارقهم فيها.. وبيبقى إعتمادك الأول على الله ثم على نفسك.. لو حصلك حاجة محدش هيلحقك.. انت اللى لازم تتصرف.. ف منطقى جدا إن تفكيرك بيطور وبيتغير وبتتحمل المسئولية أكتر وأكتر علشان تبقى قدها ومتتحوجش لحد فى غربتك.. لما ترجع بقى بلدك ويلاقوك كدة تفكيرك بقى غريب مش اللى متعودين عليه.. يقولولك مه خلاص الغربة غيرتك ومابقاش قلبك علينا زى زمان.. وانت وانت وانت .......... ومهما قلت ومهما إدنت فى مالطة اللى فى دماغهم لو عملت قرد مش هتعرف تغيره..

أرجع وأقول لا اللى فى بلده مرتاح وللا اللى متغرب مرتاح.. محدش عاجبه حاله.. محدش راضى بنصيبه.. كله بيغنى على ليلاه.. كله باصص للى فى إيد غيره..

أفتح بقك بقى مع أى حد وإشتكيله همك يقولك: طبعااااااا خايف من الحسد.. أكيد حاطيتطهم كدة أكوام أكوام.. ده على اساس إن تحت القبة شيخ.. وعلى أساس إنهم فى البلاد التانية مستنينك إنت بالذات علشان تنورلهم حياتهم وأشغالهم ف قاعد بقى على بنك.. تعبت من المعلقة الدهب اللى فى بوقك.. تقوم من النوم علشان تنام تانى.. وفى أوقات الفراغ تشتغل..

يا جماعة الموضوع مختلف عن تصوراتكم تماما.. آه مانكرش إن الغربة ليها مزايا.. لكن كتير بتكون عيوبها أسوأ.. كتير بتحس إن فاض بيك الكيل وعايز ترمى كل حاجة ورا ضهرك.. وترجع ترمى حمولك كلها فى حضن الناس اللى بتحبك وتحس بحبهم ودفا المكان اللى بتحبه.. ساعات بيكون نفسك توقف الساقية اللى عمال تجرى فيها ومش عارف تاخد نفسك.. وتصرخ بعلو صوتك وتقول: خلاص بقى تعبت.. لإمتى هشتغل عند ناس تسعبدنى مش من دينى وكل حياتهم حرام فى حرام.. لا يا عم كفاية لحد كدة والأرزاق على الله..

فيه ناس فعلا زى السمك لما يطلع من المية مش بتقدر على الغربة مهما كانت كارهه بلدها بترجعلها قوام.. وفيه ناس بتحفر فى الصخر فى منهم اللى بيوصل وفيه منهم اللى بتضيع سنين عمره ومش بيوصل لنص اللى هو عايزه.. وكله بتاع ربنا سبحان وتعالى

يمكن يكون نفس الكلام بينطبق على كتير من اللى قاعدين فى بلدهم.. حاسين برضه بالإهانة.. حاسين إن بلادهم بتتسرق وتتنهب ومحدش بيعمل حاجة.. حاسين إنهم شاغلين فى نفس الساقية وبرغم إن كل حبايبهم حواليهم.. بس محدش شايف حد ومحدش حاسس بأوجاع حد.. كله بيقول يللا نفسى.. كله فيه اللى مكفيه.. وبقى النت والموبيلات هى صلة الرحم ما بين كتير مننا..

بس برضه فى النهاية لازم نحمد ربنا على اللى فى إيدينا.. لازم نحس بنعمة ربنا علينا.. أكيد أكيد فى حاجة معانا مش مع غيرنا.. مش لازم بقى تروح مننا علشان نحس بيها ونندم عليها..

رحاب المليحي

طفولة مشردة

فيه حاجات فى طفولتنا بتفضل محفورة فى دماغنا.. وعمرنا ما بننساها مهما حصل ومهما عدت سنين وسنين..

وبما إنى طول عمرى نسمة وحمل وديع فأكيد عندى بعض المواقف والطرائف اللى فاكراها لسة لحد دلوقتى.. إنتوا عارفين بقى العضمة كبرت بعد التلاتين وياللا حسن الختام ولازم أرجع للتوكيل.. بس برضه لسه ذاكرتى شغالة كويس الحمدلله.. المكن لسه سليم ومانتهتش صلاحيته لسة

من المواقف اللى لسه فاكراها:

- أنا مش بحب حد يتنفس ف وشى خصوصا وأنا نايمة.. يعنى مش بحب يبقى فيه كائن كدة حاطط مناخيره فى وشى وشغال بقى شهيق وزفير.. خوفا من إن فى مرة مثلا يسحب الستارة أو يشد نفس جامد يبلع فردة شبشب..

المهم، وأنا صغننة كانت القطة بوسى لسة والدة.. وأنا قررت أنيم ولادها جنبى على السرير.. وفعلا أخدت اتنين منهم يناموا جنبى.. بس لسوء حظ بيبى منهم إنه كان نايم وشه فى وشى.. وعمال يتنفس فى وشى فماكنتش عارفة أنام.. عملت إيه؟؟ رحت حاطة المخدة عليه وقتها عرفت أنام فى هدوء.. بس لما صحيت الصبح وشيلت المخدة مالقتش فيه نفس.. ماااااات يا حرااااام.. مش عارفة ليه؟؟؟ برغم إنى أنا نمت كويس..

****************

- جاتلنا ضيفة فماما طلبت منى أعزم عليها بالشيكولاتة.. بعدها بشوية جالنا ناس تانية وهى قاعدة وأخدت شيكولاتة تانى.. بعدها بشوية جم ناس تالتة.. ودى مفيش ياما ارحمينى.. وقبل ما تمشى بقى.. بتقول لى شكرا يا حبيبتى على الإتنين شيكولاتة اللى أخدتهم.. قلت لها لأ يا طنط دول كانوا خمسة وياريت ماتجيلناش تانى.. ماما زغرتلى مش عارفة ليه!! يعنى هى جاية لنا علشان تخلص الشيكولاتة بتاعتنا وتروح؟ إيه الناس دى؟

**************

- أنا كنت البنت الصغيرة وسط تلات ولاد.. أخويا وولاد خالى.. فطبعا بحكم لعبى معاهم كنت مسترجلة جدا.. ولاد خالى كانوا معايا فى المدرسة وهما أكبر منى بكتير.. بس كان فيه واحد منهم بيخوف اصحابه بيا.. لو حد ضايقه يقول له هاجيبلك رحاب، التانى يقول له خلاص خلاص.. علشان كنت بضرب بالشلاليت وباعض.. وفى البيت كنت بجرى ورا أخويا اللى أكبر منى بتمان سنين ونضرب بعض وفى الآخر أكلم ماما فى شغلها اعيطلها علشان إيده تقيله

*************

- كنت رويتر ما شاء الله عليا.. إلا ما فى حاجة تحصل فى بيتنا غير لما انزل أحكيها لجدتى وخالتى.. بس لما كانوا يسألونى كلتوا إيه وأقول لهم.. جدتى تقول لى طيب اطلعى جيبيلنا طبق منه مثلا.. أقولها إيه ده هو أنا ماقولتلكيش ؟؟ دة خلص خلاص.. كريمة جدااا من يومى

**************

- واحدة قريبتنا غلطت مرة وجابتلى عروسة طولى بس المشكلة إن كان شعرها أصفر.. كنت بمسكها بقى يوماتى أسشورلها شعرها وأسرحه لحد ما بقت قرعة.. ماما قالت لها رايحة تجيبيلها عروسة شعرها أصفر مش تراعى شعور البنت.. اوعوا تفتكروا إنى كنت معقدة - نوهائى-

***********

- علشان بينى وبين أخويا تمان سنين.. عمرنا ما كنا اصحاب وإحنا صغيرين.. دايما كان فيه بينا مشاكل.. هو طبعا عايز يفرض شخصيته عليا وأنا رافضة دة تماما.. وكنت أقول له طول ما بابا وماما عايشين مالكش دعوة بيا..

كنا بنتصاحب فى حالة واحدة (مصلحة يا شقيق).. لما يكون هو عايز ياخد العربية علشان يخرج مع اصحابه.. وعارف إن بابا مش هيرضى يديهاله غير لو أنا معاه.. علشان حوبا طبعا ماينفعش تتبهدل فى المواصلات العامة.. فيزقنى بقى على بابا ويقولى عايزة تروحى السينما معايا روحى قولى لبابا.. وأنا طبعا مصلحتى فوق خلافاتى مع أخويا حبيبى.. أقول لبابا يدينا العربية ويبقى كدة الكل مستفيد أنا وأخويا.. احتمال بابا يكون المتضرر الوحيد.. ماهو بيدينا العربية وفلوس السينما والعشاء بره.. أنا أصلى مش بعتبر نفسى روحت سينما وخرجت غير لما اتعشى بعدها برة..

****************

- كنت بحب قوى أبيت عند خالتى (الله يرحمها) وأنام جنبها.. إحنا كنا فى نفس العمارة.. بس أنا كنت برفص كتير وأنا نايمة.. مرة صحيت مالقيتهاش جنبى.. بصيت كدة على الأرض بالصدفة لقيتها نايمة جانب الزبالة على الأرض.. تقريبا فى اليوم ده رفصت بزيادة

- كنت بتأثر قوى بالأفلام العربى النكد.. مرة فى نص الليل وأنا قاعدة جنبها وبنتفرج على فيلم عربى قديم.. لاقتنى بعيط وبتشحتف بصت لى باستغراب وقالت لى عايزة تطلعى عند أمك؟ فمعرفتش أرد من كتر الشحتفة اللى أنا فيها بس شاورتلها على الفيلم.. ففهمت إنى بعيط تأثرا بالفيلم.. فقالت لى لأ وعلى إيه ؟؟ ننام أحسن وقفلت التلفزيون.. وسابتنى لأحزانى بفكر يا ترى هتعمل إيه البطلة مع البطل

- دايما بحب لما حد يطلب منى طلب إنه يطلبه بالتفصيل الممل.. كنا نبقى قاعدين فى الصالة ويجى فيلم خالتى عايز تسجله.. تقول لى روحى يا حوبا افتحى الفيديو.. ف أسمع الكلام وأروح افتح الفيديو.. ولما يخلص الفيلم تقولى قومى معلش يا حوبا اقفلى الفيديو.. أروح قفلاه وأنا ببرطم هى خالتى اتجننت وللا إيه!!! وبعد كذا مرة وخالتى مش بتحرم.. لقيتها فى مرة بتسألنى هو أنا لما بقول لك روحى افتحى الفيديو بتعملى إيه؟ قلت لها بروح افتحه.. قالت لى وتدوسى (ريكورد) علشان يسجل الفيلم؟ قلت لها لأ طبعا، إنتى بتقولي لى افتحى الفيديو.. بس ماقلتيليش سجلى..

** عارفة من غير ما تقولوا إنى حمل وديع ونسمة.. بس ماحدش مصدقنى مش عارفة ليه.. ياللا اهو الواحد بيعمل الخير ويرميه الترعة

حوبا الأروبة

ماما ذات حدين

فتحنا عينينا على كلمة ماما بتتقال من الزوج للزوجة.. وكانت ماما أول كلمة نقولها لما عرفنا يعنى ايه نحط حروف جنب بعض ونتكلم..

الطفل أول حد بيفتح عليه عينيه وياخده ما بين دراعاته بكل حب وحنان هى ماما.. فطبيعى إنه يكبر على حبه لماما ويقعد فترة كبيرة ميعرفش ينطق كلمة تانية غير ماما..

الزوج بيحس فى مراته بالسكن والدفء وإنها بيته وحضنه وأمانه اللى بيرمى فى أحضانه كل حموله ويحط راسه على صدره ويعيط من غير كسوف.. علشان كدة بيحس إن مراته زى ماما.. فبيقولها يا ماما من غير تفكير..

الأم بتخاف على بنتها من كل صغيرة وكبيرة.. ودايما ملاحقها بنصايحها اللى مش بتخلص خوفا عليها وحبا فيها.. وقلبها بيقع بين ضلوعها لو حصل لها أى مكروه.. كتير تلاقى الأم بتقول للبنت (حاسبى يا ماما).. البنت تبصلها باستغراب وبراءة وتقول لها (أنا مش ماما)..

زى ما الأم بتعطف على بنتها وتديها حنانها وحبها.. بتكون هى كمان محتاجة حضن بنتها وحنانها وحبها ليها.. فكلمة ماما بتطلع بكل عفوية من الأم للبنت تشمل كل حنان الدنيا.

تلاقى المتغرب أو اللى فقد ماما.. اتعرف على سيدة كبيرة سواء أم صديق له أو ربنا وقفها سند له فى طريقه.. تلاقيه بكل حب وتلقائية يقول لها يا ماما.. من غير حتى ما يستأذنها إنه يشيل الكلفة ما بينهم ويسمح لنفسه إنه يعتبرها زى ماما.. وده علشان حس إنها زى ماما فى حبها وعطفها عليه ودفء حضنها له.. اللى مش شرط يكون حضن مادى.. ممكن جدا يكون معنوى.. لكن بيكون فى أشد الحاجة للأحاسيس دى من ماما حتى لو ماكانتش ماما.

ولــــــكن

من منظور تانى.. نلاقى كلمة ماما بتستخدم كتعبير تهكمى أو استهزاء..

تلاقيها بتتقال ما بين الكلام سواء بعصبية أو تقليل من شأن الطرف التانى زى:

ليه هو انتى فاكرة نفسك مين يا ماما؟

ليه يا ماما هو انتى هتبقششى عليا؟

العبى بعيد يا ماما؟

ربنا يسهل لك يا ماما

ماما حلوة

السؤال بقى: ليه؟ وعلشان إيه؟ كلمة ماما كلمة تحمل معانى كبيرة أعمق بكتير من ظاهرها.. إزاى ممكن نقولها كدة بكل بساطة من باب التريقة أو الاستهزاء أو التقليل من قيمة البنى آدم..

حتى كلمة ماما بقت تحمل كذا معنى وبقت ذات حدين؟؟!!!!! ومش عجبى

رحاب المليحي

مثالية على حق

مش عارفة ليه لحد دلوقتى ماخدتش نوبل الأم المثالية؟ يمكن علشان لسه ماخترعوش حاجة كدة للأم.. احتمال برضه.. أصل أنا أجدر وأنسب واحدة يتقال عليها مثالية بشدة وبعنف..
إنتم شكلكم فاكرينى بتريق... أبدا نهائى.. علشان تتأكدوا بنفسكم تعالوا معايا نقضى يوم عندى فى البيت وإنتم تشوفوا بنفسكم .. بس اقفوا ورا الكواليس قصدى ورا الباب.. واتفرجوا على يوم فى حياة أحسن أم مثالية فى الدنيا بل فى العالم..

تررررررن تررررررررن
- ها، اوووف انت بترن ليه دلوقتى يا مزعج.. صحتنى من نص الحلم.. دة انا كنت خلاااااص.... يوووووووه اوووووف... ياللا استعنا على الشقا بالله..
- يوووووما، يللا اصحى علشان تروحى المدرسة.. انتى يا بنت قومى ماتعمليش نايمة
- هاووووم، طيب هقوم بالراحة هى الدنيا هتطير
- انتى كمان بتردى عليا؟؟ قومى ياللا بدل ما انكد عليكى على الصبح
- اوف، كل يوم مدرسة كل يوم مدرسة.. خلاص تعبت.. إيه التعذيب دة؟
- تا..... إيه؟ تعذيب؟ ده على أى اساس يعنى؟ على اساس انك بتروحى تسيئلهم المكان وللا من كتر الواجبات اللى انتى مش ملاحقة عليها وبتعمليها
- (ما انا مش هخلص بقى اقوم اغسل وشى احسن)
- سمعينى صوتك كدة.. بتقولى حاجة؟
- صباح الخير يا مامتى
- وانتى من اهله يا اختى قومى إخلصى
- إهىء إهىء، هاااتى بقى هااااتى
- يادى النيلة وآدى أختك كالعادة بتحلم ان حد بيرخم عليها وهى اساسا ترخم على بلد
- هاها، سيبيهالى أنا هصحيها يا مامى؟؟
- لأ وعلى إيه هى أختك الصغيرة أينعم بس هتقوم تشوطك.. إنجزى انتى والبسى وأنا هصحيها
- (كل حاجة لأ، لأ، نفسى مرة اسمعك بتقولى على حاجة آه... أمهات غريبة مريبة)
- لوكا هتصحى وللا إيه؟
- اييييييه؟ انااااام، عايزة انااااام
- طيب اريح برضه وفرتى صداع الصبح وتلاقيكى اساسا مش دريانة بتقولى إيه
- مامى، بابى بينده عليكي
- ها، هنبدأ بقى الطلبات اللى مش بتخلص..... أفندم؟
- هى فانلة لوكا بتعمل إيه عندى فى درج فانلاتى؟
- عادى يعنى غلطة مطبعية
- ماشى بلاش دى.. هو مش لون القميص ده كان ابيض قبل ما يتحط فى الغسيل.. يا سبحان الله تحول لونه من الابيض للبمبى إزاى؟
- شوفت لا سحر ولا شعوذة.. وبعدين يا سيدى اعتبر نفسك اشتريت قميص جديد.. ده أنا حتى بخدمك كدة.. ناس غريبة مش بتقدر أى حاجة خالص
- .............
- عاااا عاااااا
- يا فتاح يا عليم، إيه يا لوكا صاحية تطلعى علينا زرابينك ليه؟
- عايزة اروح معاكى
- تروحى معايا فين؟
- المدرسة مع أختك
- أختك انتى؟!!
- آه، أختك إنتى مامى
- آه اختك إنتى.. اللى هى يووما يعنى؟
- آه يووما
- لأ اقعدى فى البيت لحد ما آجى علشان الجو برد
- ياللا يا يووما هانم خلصتى لبس؟
- إيييييه، بالبس، ماتقوليلش، ماتسألنيش، هالبس لوحدى
- بنت؟ إنتى بتتكلمى كدة إزاى؟ إحترمى نفسك بدل ما اديكى على وشك.. يللا علشان تتسرحى
- ...... اى اى يا ماااااما، بالرااااحة ماتعمليش جامد
- (أهو لما أحب اطلع غلى بهدوء ومن غير ما انطق أسرحلهم شعرهم بغل).. فين الجامد ده!! ده أنا حتى باسرح بالراحة قووووووى
****************************
- ها يا يووما عملتى إيه فى المدرسة النهاردة؟
- شفتى يا مامى اللى حصل.. My Friend النهاردة....
- مين ياختى؟
- My Friend يا مامى
- آه اوك، ماله؟
- قال للميس إن باباه دخله فى الفريزر وقفل عليه.. ومامته طلعته كان بقى فروزن على الآخر.. ويا حرام كان بردان خالص خالص.. ومامته اقعدت تنشفه بالسشوار
- لا والله؟؟ وبعدين؟
- فصعب على الميس كتير وقالت للمديرة.. واتصلوا بمامته علشان تيجى يشوفوا كلامه صح وللا لأ.. عارفة بقى يا مامى لو طلع فعلا كلامه صح هيعملوا إيه فى مامته؟
- اييييييه؟
- هو أنا مافهمتش قوى.. بس متهيألى هيزعلوها يعنى زى ما زعلت her son
- ممممم، أنا بقول مترميش ودنك للكلام العبيط ده لحسن يهفك دماغك تخترعى قصة كدة فى المدرسة وتعمليلنا مشاكل
- (يارييييت، تصدقى فكرة).... أنا؟؟؟؟؟ لأ طبعا يا مامتى ده أنا بحبك.. هتدينى تشوكلت؟
- آه طبعا يا حبيبتى، عندك العلبة كلها خدى اللى نفسك فيه
********************************
- أنا جعانة
- طيب يا لوكا، شايفانى واقفة العب؟ ما أنا بعمل الأكل آهو
- إنتى بتعملى ايه؟
- أووووف، على الأسئلة اللى مش بتخلص.. بقطع البصل يعنى شايفانى بانيل إيه؟
- يا مامى هو انتى بتقطعى البصل فى الزبالة ليه؟ هو فيه كخ؟
- زباااا ......!!!!! (إيه اللى أنا بعمله ده صحيح؟!!) هااا، آه آه يا حبيبتى كان فيه كخ
- الأكل جاهز وللا لسه؟ أنا واقع من الجوع
- خدامتك آمنة... حاضر خمس دقايق بس
- مامى مش لاقية القلم بتاعى عندى هوم وورك
- حررررررام عليكم بقى، ارحمونى شوية.. دورى عليه ما إنتى مهملة وبتضيعى حاجتك
- مامى أنا فى الحمام تعالى بسرعة
- بسسسسسسسسس بقى كفاااااية، هو أنا هعمل إيه ولا إيه؟ إرحمونى بقى
- بالراحة على البنت.. هى عملت إيه يعنى؟
- ماهو طبعا، ما انت طول اليوم بره ولما بتيجى بتتفرج على التلفزيون.. ولا كأنك موجود اساسا
- قصدك إيه يعنى؟ زيى زى قلتى!!!!!!!
- حاجة زى كدة
- .............
- يللا الأكل جاهز
- هييييه هناكل
- هيييييه
- ده على أساس يعنى إنى مجوعاكم على طوول!!!!
- إيه دة يا حبيبتى!!!!! هو ليه الثوم عايم فوق الملوخية؟؟؟
- ممم، تقريبا نسيت أحمره
- .............
- عادى يعنى، هو أنا دماغى فيا من طلبات عيالك اللى مش بتخلص
- (خلاااص، سد، سد)... هو أنا قلت حاجة.. ما أنا باكل أهو وأنا ساكت
- حساك يعنى متضرر
- إطلاااااااقا، يعنى هيجي مثلا أكتر من اليوم اللى كنتى بتجربى تعملى مكرونة بالباشيمل وقررتى ماتحطيش لحمة فيها لحسن تطلع وحشة وتترمى
- ...... هاهاها ده كان زمان يا حبيبى
- (قال يعنى فيه تغيير!!).. طبعا طبعا يا حياتى، وللا فاكرة لما مكنتيش عارفة اللحمة من الفراخ.. حتى بعد ما طبختيها وكلتيها كمان.. بتقوليلى حلوة قوى اللحمة البيضا دى
- إيه ده فيه إيه؟؟؟ هو إنت قلبك أسود كدة ليه؟؟ ما قلنا كان زمان بقى
- (قال زمان قال) آه طبعا يا حبيبتى، دى إنتى حتى بقيتى بريمو دلوقتى.. مش كدة وللا إيه يا بنات؟
- ..............
*********************
- مامى مامى مامى مامى
- اييييييييييييييييييييييه
- عايزة العب ويي
- لوكا إنتى كلك على بعضك تلات سنين ولا بتعرفى تلعبى ولا تعملى، بتلاوشى بس
- مامى، لوكا (سريي) وأنا (سيكس) صح؟
- آه صح
- أنا اكبر منك يا لوكا.. لالالالالا
- لاااااااأ، إنتى وحشة
- آااااااى، مامى لوكا عضتنى، عااااااا
- إنتى وهى على أوضتكم.. يالاااااا
- لأ أنا مش هروح بقى هاه
- انتى عارفة انا هعمل فيكى إيه يا لووكا؟!!
- اه هتضربينى ومش هتدينى حاجة حلوة.. صح؟
- عااااااااااااااا.. يللااااااااا على أوضتك يا لوووووكا.. واقولى سورى ليووما
- لأ مش هقول.. أنا حوه وجميلة..يووما وحشة ونوتى
- مفيش ويي النهاردة.. وامشى يللا على أوضتك
- (يووووووه.. وإنتى كمان يا مامى نوتى بقى ها)... سورى مامى سورى خلاص.. يووما حوه وجميلة وأنا بحبها
- إيه ده؟؟؟ إيه ده؟؟؟ هو الكرسى ملزق كدة ليه؟ والحيطة كمان؟ إيييييه ده؟ الموكيييييييت؟؟
- دى لووكا يا مامى، طلعت فوق الكرسى وأخدت حاجة كدة لزق من عند بابى وقعدت تلعب بيه.. وأنا قلت لها كدة غلط بس مش سمعت الكلام
- آه يا مامى ده أنا كنت بلعب بيه.. إيه رأيك؟ حلو؟
- حلووووووووو؟ حراااااااااااااااااااااااااااام عليكم.. والله حرررررررام
- فى إيه صوتك جايب آخر الدنيا ليه؟؟ حرام عليكى نفسك واللى بتعمليه فى البنات
- اسكت خاااالص، الهانم بنتك أخدت الفازلين ودارت بيه فى الشقة كلها تنشر إبداعاتها
- كدة يا لوكا؟ كدة غلط يا حبيبتى.. يللا قولى لمامى سورى
- هو ده اللى ربنا قدرك عليه!!!!!!!! ارحمنى يااااااارب
- اهدى بس وكله هيبقى كويس
- أنا داخلة أناااااااااااام.... أنا خلاااااص تعبت.. وهيجرالى حاجة منكم... ياللا على السرير انتوا الاتنين ياللاااااااااا
- مش عاااااايزين ننااااام..... عاااااااا
- على أوضتك منك ليها.. يللاااااا كفاية قوى عليا كدة النهاردة
- (آه يا صداعى يانى آه.. أديكوا شفتوا بنفسكم اللى بيحصل فيا.. جنان رسمى.. وده يوم من سبع أيام.. بس مش بذمتكم أنا ملاك ونسمة كمان؟؟ وهما كللللللهم وحشين)

رحاب المليحي