شات الموبيل

شرط اى موبيل جديد حابين نشتريه انه يكون سريع ع النت وبينزل عليه الواتس اب والفايبر

وده عشان حياتنا انحصرت ف الشات.. بقينا بننسى الكلام من كتر ما احنا مشغلين ايدينا بالساعات ع الكيبورد.. بنفرح ونزعل ونواسى ونطبطب ونعزى ونبارك بكومنتات ليس إلا

حتى لما بنثور ونغضب بيكون  ع النت.. نقعد نهري ونزعق وممكن نشتم واحنا مستخبين ورا شاشه.. تخلص الهوجه ونهدى ننسى وندور ع حاجة جديدة نشغل نفسنا بيها

بقينا حاصرين نفسنا ف العالم الافتراضى، مشاعرنا نفسها بقينا نعبر عنها من خلال شاشة وزراير..

حتى مع أصحابنا بقينا نتحجج اننا مابنحبش الرغي ف التليفونات ولما نتكلم مش بنلاقى كلام نقولوه.. طب نرجع بالزمن ورا كدة لسنين كتير.. يا ترى كنا بنتواصل معاهم ازاى؟ وبنقابلهم ونخرج ازاى؟ لو فعلا مالناش ف الرغى.. ورأيي الشخصي ان ده هروب من اننا نتعب نفسنا ونفتح بوقنا ونتكلم ونرجع صلة الرحم والتراحم ونرجع التواصل الاجتماعى بحق وحقيقي زى زمان

طب ما احنا بنروح اشغالنا ونتكلم مع ده ونشوف مصالح ده ونضحك ونهزر ونتخانق.. اشمعنى يعنى وقت ما يبقى مطلوب مننا نعمل واجب لحد من اصحابنا أو اهلنا نبعت له ع الفيس ولا الواتس ومعلش اصلى مش قادر اتكلم هبقى اكلمك بعدين ونتقابل.. وبعدين ده احيانا كتير مابيجيش أو ممكن يجي متأخر ف بيكون ماسخ.. أصل أى حاجة بتيجي متأخر بتكون مسخت ومابقاش ليها لزوم

اتقوقعنا ع نفسنا ونرجع نشتكي لما يجي لنا اكتئاب من الوحدة مهو احنا اللى بنعمل ف نفسنا كدة..

بنحسها مثلا لما يكون مننا حد مشهور ع الفيس وعندك أصدقاء بالألفين واحد.. ولما تيجي تعمل ايفنت تلاقى ال2000 بيقولولك جايين ووراك يا معلم..

 وتبقى متفشخر كدة وسعيد بلمة الناس وحبهم ليك وان اهو ده يثبت انه مش عالم افتراضى ولا حاجة واهو الناس هيتجي تفرح لى وتساندنى.. وتفاجأ يوم الايفنت بإن كل الناس طلعت لهم ظروف ولا جم ولا اعتذروا.. وتصفصف ع 20 واحد بالكتير اللى جم الايفنت وممكن جدا يكونوا فاضين مش لاقين حاجة يعملوها ف جم مش دعما ليك ولا حاجة

عايزين نحاول نرجع تجمعتنا ونجمع الناس حولينا بجد ف خروجه ولا اجتماع عائلي نسمع رغيهم وضحكتهم الصافيه اللى طالعه من القلب.. مش مجرد ايموشن ع الشات وممكن جدا مانكنش حتى ابتسمنا لما بعتناه مجرد بس بنجامل اللى قال حاجة المفروض تضحك

رحاب المليــــــحي

سيبوا الناس ف حالها

أنا سني 31 سنة متجوزة من 9سنين والحمدلله عندى ولد وبنت

بدأت مشكلتي لما سافرت الكويت من 3سنين.. وبحكم ان البلد اى حركه فيها لازم تستخدمى العربيه حتى لو رايحه آخر الشارع.. ف مابقيتش بعمل مجهود خالص.. وحتى ف شغلي قاعده ع المكتب ع طول

ف بطبيعة الحال لازم اتخن.. بس لأنى طويله مش قصيرة.. طولي 173سم ووزنى 103ك ف تخنى مش البشع يعنى.. وجسمي الى حد كبير متناسق.. ف انه يكون مجال للحوار الدائم بالشكل المستفز ده.

ومع ذلك مبترحمش من سخافة الناس حتى أصحابي للاسف

كلام بقى من عينة انتى لو قعدتى ع حد تفطسيه.. يا فشيله.. هو انتى مابتبطليش أكل..

حتى العملاء بيبصوا برضه للشكل والمظهر.. لو واحدة رفيعه وحلوة تبقى هى شخصيتها كويسه..

مابقاش عندي ثقه ف نفسي خالص.. نفسي أخس وبقيت حاسه انى مأجله كل حاجة ف حياتي لحد ما وزني يقل؛

لكن للاسف معنديش وقت خالص العب رياضه.. وبرغم حر الكويت الا انى مابقيتش بلبس غير غوامق عشان ادارى نفسي من عيونهم والسنتهم اللي مابترحمش

بس بجد نفسيتي تعبت من كلام الناس.. كل يوم بيجرحوني الف مرة وهما مش حاسيين.. كل ليله بنام دمعتي ع خدي من قسوة كلامهم؛ مش عارفه ليه مش سايبنى ف حالي..

خلاص بقى نفسي اسيب الشغل واقفل بابي عليا وانعزل عن العالم.. حاسه ان حياتي وقفت ع كدة

يا عالم كل واحد ادرى بنفسه وبحياته.. ليه الناس بتحشر نفسها ف حاجة ماتخصهمش.. هو جسمي ولا جسمهم..

نفسي اكسر ف نفسي احساسي بعدم الثقه والاحباط بسبب كلامهم وابطل اسمع لهم واعيش حياتي عادى واتبسط لكن لا قادرة ولا عارفه..

ملحوظه:
هى بعتت لي صورتها عشان تأكد لي كلامها
هى فعلا جسمها طبيعي جداااااا ومش مليانه نهائي بالشكل اللي تخلي الناس تكسرها بقسوة
كلامهم خالص

رحاب المليـــــــحي

واقع متكرر

** قبل الجواز

مفاجأت وهدايا ف كل المواسم والأعياد.. وهدايا بدون مناسبه كمان مايضرش

حب يغرق الكون وكلام ومشاعر من هنا لبكره

ووعود واحلام لبعد الجواز..

مش هخليكى عايزة حاجة.. عمرى ما هزعلك.. كل ما يبقى معايا فلوس مش هحرمك من حاجة.. مرة هدية الماظ ومرة نسافر نشوف الدنيا..

هصحيك ع حب وأنيمك ع حب.. هافهمك من نظرة عينيك.. مش هنيمك زعلان ابدا.. هعملك كل الحاجات اللي بتحبها.. مش هبقى نسخه تانيه من والدتك بس برضه هعملك كل الحاجات اللي انت متعود عليها بالتاتش بتاعي.. عمرنا ما هنبات زعلانين

** يجى وقت الجد والجواز يقرب

اعصاب متوترة.. فلوس بتخلص.. الشقه مفيش فيها حاجة خلصت.. امك قالت لي .. ابوكى عمل ..

معلش يا حبيبتى اعصابي متوترة شغل الصبح وعمال بليل.. انا اسفه يا روحي انا كمان مضغوطه من كمية الحاجات اللي بجيبها ف وقت قصير

وف صوت واحد بحبك

** بعد الجواز:

بتاع سنة كده لو ماكنش أقل بكتير.. لسه بياخدوا ع بعض.. ومقضينها لسه حب وحنيه.. والوعود شغاله اهو.. خروج كل ويك اند.. وحشتينى.. بحبك.. وعشاء ع ضوء الشموع

المسئوليات تبدأ تكتر.. تحمل، تخلف، عايزة فلوس، البيبي محتاج بامبرز، سرير، اكل، لبس..

انا طهقت من الشغل و زهقت من هات هات.. مش ملاحق.. انا كان مالي ومال الجواز.. ما كنت قاعد ف بيت اهلي ملك.. فلوسي كلها بصرفها ع نفسي.. ولا نكد ولا وجع دماغ وطلبات مابتخلص

هو انا يعنى اللي لاقتنى ف الشارع.. ما انا كنت ملكة متوجه ف عرش أبويا.. لا حد بيصحينى ف عز الليل اعمله أكل.. ولا عيل يفزعنى من احلها نومه واقوم منكوشه ارضع واهشك وادلع.. ابو الجواز ع اللي عايز يتجوز 

وتستمر دوامة الحياه هكذا.. واهى ايام وبتعدى..

لا بس فيه ناس بتقدر تفضل سعيده ونفسها طويل بعد الجواز

فيه ناس بتجدد ف حياتها عشان مايموتش الحب ف زحمة دوامة الحياة

:)لو تعرفوا الناس دى عرفونا عليهم عشان نكتب عنهم :)

رحاب المليــــــحي

5 اسباب بيخلوا اجدادنا يقولوا على الشباب تافه

جدك وجدتك شايفين احفادهم كسله وتافهين.. بيمثلوا انهم مش ع درايه باللى بيحصل حوليهم.. لكن هما بيقارنوا حياتهم زمان وهما شباب بحياتكوا دلؤقتى، ف بتصعبوا عليهم

تعالوا ندخل جوه دماغهم ونعرف ليه بيقولوا ع شباب الايام دى تافه

1-    الطرق الحديثة غير صحية

 اللى وصلتوا له ف عالم التكنولوجيا خلالكم كسلى وحياتكوا غير صحية.. مابتقدروش تمشوا، بتركن عربيتك قريب ع قد ما تقدر لمدخل شغلك او بيتك.. ولو لاقيت السلم المتحرك مش شغال ممكن جدا تأجل اللى رايح تعمله وترجع لما يصلحوه أو تستخدم الاسانسير

لكن ع ايامنا المشى ماكنش تمرين كان اسلوب حياة

أكلكوا كله تقريبا من الشارع مفيهوش اى عناصر غذائية.. ف انتوا كدة بتصرفوا  فلوسكوا لخفض ضغط الدم عندكوا.. يعنى للاسف بتأذوا نفسكوا وانتوا مش حاسيين  

2-    الثقافة صفر

ع ايامنا ف المدراس ماكنش فيه جوجل ندور فيه ع المعلومات اللى محتاجينها.. كنا لازم نجيب موسوعات كتير عشان نوصل للمعلومة..

لكن انتوا عندكوا انترنت وجوجل بتوصولوا للمعلومة ف لحظة من غير تعب لكن برضه من غير فهم بتنقلوا وخلاص

ع ايامنا لما كنا بنتجادل ع حاجة كنا بندور ع الرأى المنطقى اللى يقنعنا.. لكن انتوا بتاخدوا المعلومة زى مهى من ع جوجل مابتفكروش.

3-    مابقاش فيه عاطفة

كنا لما نتجرح نبكى مايهمناش ان حد يشوفنا.. ولما نفرح، نفرح من قلوبنا بأى طريقة ان كانت حتى لو طريقة مجنونة مش قلقانين من الناس ليقولوا علينا ايه الطفولة دى ولا ايه الجنان ده

لكن انتوا لو حد مات لكوا حتى، بتنزلوا دمعتين مجاملة.. ده فيه بنات بتخاف تبكى لحسن الماكياج بتاعها يبوظ

مابقيتش مستغرب من انتشار الدكاترة النفسيين ف حياتكوا

4-    الحبوب المنومة

ع ايامنا كان السرير بيتعمل من ارخص وابسط الحاجات.. لكن دلؤقتى السراير بقيت غالية جدا عشان صناعها بيتفنانوا انهم يوفرلكوا سبل الراحه فيها.. ده انتوا مابقيتوش تعرفوا تناموا من غير حبوب منومة

5-    عقدتوا كل حاجة سهلة

ع ايامنا كنا ف اعياد ميلادنا بنفرح بهدية بسيطة أو إننا نروح السوق نجيب لنفسنا فاكهة طازة زى أبل أو بلاك بيرى

دلؤقتى انتوا كمان بتجيبوا لولادكوا أبل وبلاك بيرى لكن بمفهوم تانى خالص.

  

فعلا انتوا الاحفاد تستحقوا الشفقة

ترجمة: رحاب المليحي

* ست انواع من البنات لازم هتشوفهم ف أى فرح مصري *

أجنبية اتجوزت ف مصر واتعملها فرح نص المعازيم فيه كانوا مصريين.. ف ده كان رأيها من اللى شافته

 ف الفرح

- البنت اللى بتاخد تستعلاف صورة سيلفى ووراها الكوشة عشان تبين انها ف فرح.. 

وتقضى نص الوقت تاخد صور والنص التانى تنقى احسنهم وتحطهم ع

 Instagram

- البنت اللى نسيت تلبس قبل ما تنزل من بيتها.. وناسيه انها مش رايحة بار.. وانها رايحة فرح محترم

- البنت اللى تكعبل صاحبتها وتوقعها عشان تاخد بوكيه العروسة بالعافية..

 وخصوصا لو كان معاها صاحبها ف الفرح.. ف بكده بتفهمه ان الدور عليهم ولازم يتجوزوا قريب

- البنت مزدوجة الشخصية.. نصها شخصية كيوت انتيمة العروسة، مرحه وبتحاول تعمل جو وتقوم 

الناس عشان يرقصوا

ونصها التانى بودى جارد للعروسة بوش مرعب تحسها بتقولهم اللى هيقرب للعروسة هعُضه

- البنت اللى بيبان من نظراتها وشكلها انها بتغل من العروسة.. ومقضيها تريقه ونقض ع كل حاجة حوالها ابتداءا بفستان الفرح لحد الاكل والمعازيم

- البنت اللى تلبس ابيض ف ابيض عشان تحط نفسها ف منافسه مع العروسة.. وبكده بتحاول تلفت 

ظر الناس ليها انها احلى من العروسة

ترجمة: رحاب المليـــحي

إدينى بالونتى لو سمحت

مجموعة من 50 فرد كانوا بيحضروا مناظرة
(seminar)

وفجأة وقف المتحدث عن الكلام وقرر انه يعمل نشاط للمجموعة كلها

ادى كل واحد من المجموعة بالونة وطلب من كل واحد فيهم انه يكتب اسمه على البالونة اللى معاه 

بعدها جمع كل البلالين وحطها ف اوضة تانية

وبعدين سمح لهم انهم يدخلوا الاوضة التانية اللى فيها البلالين اللى عليها اساميهم 

وطلب منهم ان ف خلال 5ق كل واحد يلاقى البالونة اللى كاتب عليها اسمه

وبكل حماس بدأ كل فرد ف المجموعة يدور ع بالونته 

وكانوا في فوضى وعمالين يزقوا بعض ف هرجله كبيرة عشان يلاقوا البالونة اللى عليها اساميهم

وبعد 5ق محدش قدر يلاقى البالونة اللى عليها اسمه

دلوقتى اتطلب من كل فرد انه ياخد بالونة عشوائية قدامه ويديها 

للشخص اللى اسمه مكتوب عليها 

وف خلال دقايق كان كل واحد منهم معاه بالونته اللى عليها اسمه

المتحدث قالهم:: * هو ده بالظبط اللى بيحصل ف واقع الحياة.. كل واحد بيدور ع سعادته ف حماس مش عارف هى فين.. 

لكن السعادة الحقيقية تكمن ف اسعاد الاخرين.. حاول تسعد الناس وقتها بس ده هيعود عليك 

بالسعادة اللى بتتمنها

وهو ده الغرض من حياة البشر *

ترجمة: رحاب المليــــحي

اكتئاب ما بعد الولادة

دايما بعد الولادة ف لندن يوزعوا ع الامهات معلومات عن معنى الاكتئاب ما بعد الولادة سواء كان أول

  ((طفل لها أو أكتر))

عن الاكتئاب ما بعد الولادة نتحدث* 

انك يكون عندك بيبى دى حاجة من الحاجات اللى تخليكى فى قمة سعادتك وحماسك لكن لو جينا للواقع اللى هتعشيه هتستغربى من الخبرة اللى هتاخديها وماكنتيش تتوقعيها

هتلاقى ان حياتك فجأة اتغيرت.. 

زى ان مابقاش ليكى حياتك الخاصة ولا الاجتماعية ..

زى ان علاقتك بأسرتك ف البيت هتختلف وهتبعدى عنهم نوعا ما لان مابقاش عندك الطاقة انك تديهم زى الاول.. لان البيبى بيسلب كل طاقتك طول اليوم 

هتحسى انك محتاجة حد يشجعك ويساعدك طول الوقت.. وسواء معاكى حد ف البيت أو لأ هتحسى انك وحيدة ومحدش جانبك

بعد الولادة مباشرة هتحسى ان مودك متقلب بيتغير ف ثوانى.. مرة هتلاقى نفسك مبسوطة 

لكن اللحظة اللى بعدها هتلاقى نفسك مُحمله بالمشاعر ومُحبطة وبتعيطى من غير سبب.. 

وده سببه تغيير ف الهرمونات اللى بتحصلك بعد الولاده.. ده غير احساسك ان فجأة بقى عليكى مسئولية كبيرة لوجود بيبى ف حياتك مسئول منك مسئولية كاملة

- الاكتئاب اللى بيحصلك بعد الولادة ده مش بس بيأثر عليكى تأثير سلبي ده كمان بيأثر ع أفراد اسرتك وحتى طفلك بيحس بيه..

وده ممكن مع الوقت ينتهى لو طلبتى من اللي حواليكى مساعدتك.. وماتلوميش نفسك ع اللى وصلتى له من اكتئاب لان ده امر طبيعى ولازم الكل يقدره ويتعامل معاه بشكل ايجابى لانه بالأمر الخطير اللى لازم يتعالج من جواكى

من احاسيس ما بعد الولادة ::

- احساسك بالحزن والبؤس طول الوقت

- احساسك بالخوف والقلق من غير سبب

- مفيش حاجة بتبسطك

- معندكيش نظرة مستقبليه لأى حاجة، حياتك واقفه مكانها

- احساسك بالذنب دايما لما تسىء الأمور

- احساسك انك عايزة تأذى نفسك 

- كل حاجة بقيت عبء عليكي

- احساسك انك مش قادرة تاخدى اى قرار حتى ولو ف حاجة صغيرة

- افتقادك القدرة ع التركيز 

- بتبعدى عن اصحابك وعن الحياة الاجتماعية

- احساسك انك لا عارفه تنامى ولا تاكلى حتى لو جعانه نوم واكل

- احساسك بالتعب والاجهاد ع طول

وف النهاية ده مش معناه انك كارهه طفلك أو مش حابة وجوده ف حياتك**  

لكن اللى بيحصلك ده كله بالامر الطبيعى اللى مفيش منه قلق لو قدرتى تتعاملى معاه صح

ترجمة :  رحاب المليـــحي

لندن

أفضل 10 دروس تتعلمهم ف حياتك

((الوقت بيطير هوا ))

كلمة بنقولها ع طول ودى حقيقة فعلا.. الوقت بيجرى والسنين مش بس بتسيب آثارها على وشنا لكن برضه بتسيب لنا ذكريات نفتكرها، في منها اللى جرحنا ومنها اللى فرحنا.. والحاجة المشتركة فيهم انها دروس بنتعلمها ف حياتنا ، عشان نوصل لهدف واحد وهو ازاى نعيش مبسوطين. 

* طول ما احنا ماشين ف حياتنا هنتعلم.. هعرض عليكم شوية من الدروس  اللى من وجهة نظرى من أهم الدروس اللى هتتعلمها ف حياتك

1-    أقبل نفسك زى ما انت

اول ما تقدر تتعلم ده هتقدر تحب نفسك وتحترمها.. ده هينعكس ع الناس اللى احترامك لنفسك هيجبرهم يحترموك. لما تقدر تعمل كدة هتقدر وبكل قوة تقول (لأ) لأى حاجة أو أى شخص يحاول يخليك مش مبسوط أو مجروح..

إنك تتقبل نفسك ده هيخليك تتحمل أخطاء غيرك.. بس المهم انك لما تجرح حد لازم تعتذر له وتتطلب منه انه يسامحك.. وده مش هيخلي حد يشيل منك او يجرحك ف المقابل.

*************

2-    ماتتكسفش من الطفل اللى جواك

كل واحد فينا جواه طفل بس مستنى الفرصة.. ف ماتخدش الدنيا بجدية مبالغ فيها.. لازم كل فترة تطلع بحاجة مجنونة تعملها، وماتركز مع الناس وحكمهم ع تصرفاتك.. اصل مفيش حياة سعيدة لكن فيه اوقات سعيدة.. والاوقات دى مابتجيش كتير.. ف استغل الفرصة ع قد ما تقدر

*************

3-    ساعد الناس ع قد ما تقدر

انك تساعد حد مش بس هتسعده، لأ انت كمان هتحس بالسعاده انك كنت سبب ف فرحته، اثبتت الدراسات ان الناس اللى بتعمل اعمال تطوعيه بيكونوا اكتر ارتياحا وسعادة عن الناس اللى نادرا ما بتعمل حاجة ليها مكاسب شخصية.. 

عشان كدة كل ما تلاقى اى حد محتاج مساعدة سواء قريب او حتى غريب ساعده من غير ما تستنى مقابل، كفاية تشوف فرحته أو دعوة من القلب طالعه من حد متعرفوش

**************

4-    حاوط نفسك بناس بتحبك

الناس اللى بتكون حولينا هى اللى بتحدد الشعور اللى بنحس بيها.. اذا كنت مصاحب شخص مرتاح معاه بيخليك دايما سعيد.. بيكون جانبك لما تحتاج له هتبقى اسعد شخص ف الدنيا..

 بس عشان تخلى الناس من النوعية دى حوليك لازم تكون زيهم،

ماتحبطش لما تلاقى شخص اختفى فجأة من حياتك، احيانا فيه ناس بتيجى حياتنا لمهمة محددة وبعدين يمشوا، ودول برضه لازم نشكرهم انهم ظهروا ف حياتنا حتى ولو اختفوا ممكن يجي يوم ويظهروا تانى.

**************

5-    عُمرك ما تقول (مينفعش)

انت ممكن تزعق لابنك وتقوله: ماينفعش تعدى الشارع من غير ما تبص قدامك، لكن ماتقولش: انا مستحيل اعمل ده أو انا عمرى ما هفكر كدة..

 لإنك ممكن تفكر بطريقة ما ف اللحظة الحالية.. لكن بعد فترة تحصل حاجة تخليك تفكر ف نفس الموضوع بس بطريقة تانية من غير ما تلاحظ التغيير اللى حصل لك ف طريقة تفكيرك.. أو حاجة كبيرة تحصلك تخليك ترمى كل اللى تعرفه ورا ضهرك وتعيد حساباتك ف كل حاجة بشكل جديد

***************

6-    خلى عندك وجهة نظر وخليك هادى

لما تحس ان فيه موضوع مضايقك ماتفكرش فيه بعصبية عشان ماتصعبش عليك الامور، حاول تبقى هادى وخد نفس عميق واتمشى شوية لوحدك.. أو اقعد مع حد بترتاح له واتكلم معاه ده هيطلعك من مودك الوحش..

   ف النهاية كل واحد فينا له العلاج الخاص به اللى بيلجأ له لما يكون ف حالة سيئة سواء صديق أو الهدوء والتأمل أو الرياضة أوانك  تسمع أغانى بتحبها.

*****************

7-    ادى نفسك فرصة انك تحلم

احلم ليه ماتحلمش؟ الحلم ببلاش وممكن يخلى عندك هدف، وممكن تخسر قليل بس تكسب كتير لو قدرت تحول حلمك لحقيقة..

لو قدرت تحقق حلمك وحتى لو مانجحتش لكن يكفى انك جربت وقابلت ناس واتعلمت حاجة جديدة وشفت اماكن جديدة كل ده له قيمة.

*******************

8-    ابتكر حاجة جديدة كل يوم

انك تبتكر شىء جديد هيخليك دايما متحمس ومبسوط ومش منتظر موافقة حد.. انت الوحيد اللى عارف الحاجة دى هتبقى عاملة ازاى وهتتطلع ازاى.. لو مقدرتش تعملها كل يوم اعملها كل ما تقدر. زى انك تفتكس عشاء بطريقة جديدة او انك تستخدم حاجة كنت دايما بترميها شايفها مش مهمة او انك تكتب حاجة او تزرع زارعه ف بيتك وترعاها. المهم انك تعمل تخليك مبسوط

******************

9-    اتعلم حاجة جديدة كل يوم

مش صعب انك تتعلم حاجة جديدة كل يوم زى ما انت متخيل خصوصا ف وجود التكنولوجيا حولينا، احنا بس اللى مابنديش نفسنا فرصة اننا نحاول. كل يوم قول لنفسك النهاردة هسمع معلومة جديدة او هتعلم حاجة جديدة ونفذ كلامك..

 زى انك تقرأ كتاب جديد أو انك تتعلم سوفت وير جديد، هتلاقى نفسك مع الوقت بتكتسب معلومات جديدة ماكنتش تعرفها. المهم انك تبقى متأكد ان الوقت مافتش للتعليم.

*****************

10-    علم الناس الطريقة اللى عايزهم يعاملوك بيها

كل واحد فينا عايز الناس تعامله بلطف واحترام.. وعشان ده يحصل لازم تبدأ بنفسك.. عامل الناس كويس، ابتسم للى تعرفه واللى متعرفوش.. ماتشتمش الناس ف الشارع وانت سايق عربيتك، لما تركب الاتوبيس قعد حد عجوز مكانك... هتلاقى الحاجات الكويسة اللى بتعملها هتعود عليك.

**********

ترجمـــــــة: رحاب المليــــــــحي